މިއަދު މާލޭ ހެންވޭރު ގެއެއްގައި ދަންޖެހިފައި މަރުވެފައިހުއްޓާ ފެނުނު ކުޑަކުއްޖާގެ މަރުގައި ޝައްކު އުފެދޭފަދަ ކަމެއް ނެތްކަމަށް މޯލްޑިވްސް ޕޮލިސް ސަރވިސްއިން ވިދާޅުވެއްޖެއެވެ.
ފުލުހުން މިހެން ބުނެފައިވަނީ ބަޔަކު އެ ކުއްޖާ ދަންޖެއްސީ ކަމަށް ކުއްޖާގެ އާއިލާއިން ތުހުމަތެއް ކުރާ ކަމަށް ބުނެ މީޑިއާގައި ބައެއް ޚަބަރު ފަތުރާފައިވާތީއެވެ.
ފުލުހުން ވިދާޅުވީ، މިއަދު މާލެއިން ރިޕޯރޓްކުރި މަރުގެ މައްސަލާގައި ފުލުހުންގެ ފޮރެންސިކް ޕެތަލޮޖިސްޓެއް މަރުވެފައިވާ ކުއްޖާގެ ހަށިގަނޑު ބެލުމަށްފަހު އެކުއްޖާގެ މަރުގައި އެހެން މީހެއްގެ ފަރާތުން އަނިޔާއެއް ނުވަތަ ގެއްލުމެއް ލިބިފައިވާކަމަށް ޝައްކު ކުރެވޭފަދަ ނެތްކަމަށް ފާހަގަކޮށްފައިވާކަމަށެވެ. އަދި މިހާދިސާގައި އެހެން ފަރާތެއްގެ ޢަމަލެއް އެކުލެވޭކަމަށް ޝައްކުކުރެވޭ ކަމެއް ފާހަގަ ކުރެވިފައި ނުވާކަމަށްވެސް ފުލުހުން ވިދާޅުވިއެވެ.
މީގެއިތުރުން ފުލުހުން ވިދާޅުވީ، މިމަރުގެ މައްސަލާގައި ޢާއިލާއިން އެއްވެސް މީޑިއާކަށް މަޢުލޫމާތު ޙިއްސާކޮށްފައިނުވާކަމަށް ބުނެފައިވާކަމަށެވެ. އަދި ކުޑަ ކުއްޖާގެ މަރުގައި ޢާއިލާއިން އެއްވެސް ޝައްކެއް އުފައްދާފައިނުވާކަމަށް ފުލުހުން ފާހަގަކޮށްފައިވެއެވެ.
އެހެން ކަމުން ޚަބަރު ފެތުރުމުގެ ކުރިން ޢާއިލާކަމަށް ބުނާ ފަރާތްތަށް ވެރިފަކުރުން މުހިންމުކަމަށް ފުލުހުންވަނީ ވިދާޅުވެފައެވެ. އަދި މިފަދަ ހާދިސާކުގެ ވާހަކަތައް ނޫސްތަކުން އަމިއްލައަށް ހޯދާ މަޢުލޫމާތުގެ މައްޗަށް ބިނާކޮށް ރިޕޯރޓްކުރާ ޙާލަތްތަކުގައިވެސް ޒިންމާދާރުކަމާއެކު މިފަދަ ޚަބަރުތައް ގެނެސްދިނުމަށް ފުލުހުންވަނީ ނޫސްވެރިންނަށް ދަންނަވާފައެވެ.
