މިދިޔަ ނޮވެމްބަރު މަހު ސްޕެނިޝް ލަލީގާގެ އެންމެ މޮޅު ކުޅުންތެރިއަކަށް ބާސެލޯނާގެ ކެޕްޓަން ލިއޮނަލް މެސީ ހޮވިިއްޖެއެވެ.
މިދިޔަ ނޮވެމްބަރުމަހު މެސީ ލަލީގާ ތިން މެޗު ކުޅެފައިވާއިރު، 4 ލަނޑުވަނީ ކާމިޔާބުކޮށް އިތުރު ލަނޑެއްޖަހަން އެހީތެރިވެދީފައިވެއެވެ.
ލެވެންޓޭ އަތުން 3-1 ގެ ނަތީޖާއަކުން ބާސެލޯނާ ބަލިވި މެޗުގައި ބާސެލޯނާއިން ކާމިޔާބުކުރި ހަމައެކަނި ލަނޑު ކާމިޔާބުކޮށްފައިވަނީ މެސީއެވެ. ނޮވެމްބަރު 10 ވަނަ ދުވަހު ސެލްޓާވީގޯ އަތުން 4-1 ގެ ނަތީޖާއަކުން މޮޅުވި މެޗުގައި މެސީވަނީ ހެޓްރިކެއް ހަދާފައެވެ. އަދި ލަގްނޭސްއަތުން 1-2 ގެ ނަތީޖާއަކުން ބާސެލޯނާ މޮޅުވި މެޗުގައި ސުއަރޭޒްގެ ލަނޑު އެސިސްޓް ކޮށްދީފައިވަނީ މެސީއެވެ.
މީގެއިތުރުން މިދިޔަ ނޮވެމްބަރު މަހު އާޖެންޓީނާ ޤައުމީ ޓީމަށް ކުޅުނު ދެމެޗުން ދެ ލަނޑު މެސީ ކާމިޔާބުކޮށްފައިވާއިރު، ޗެމްޕިއަންސް ލީގުގައި ޑޯޓުމުންޑު އަތުން 3-1 ގެ ނަތީޖާއަކުން ބާސެލޯނާ މޮޅުވި މެޗުގައުވެސް މެސީ ލަނޑެއް ޖަހާފައިވެއެވެ.
މިސީޒަންގައި މެސީ މިހާތަނަށް ކުޅުނު 14 މެޗުން 11 ލަނޑުޖަހައި 8 އެސިސްޓްވަނީ ހަދާފައެވެ.
ނޮވެމްބަރު މަހުގެ އެންމެ މޮޅު ކުޅުންތެރިޔާގެ އެވޯޑް މެސީއާއި ޙަވާލުކުރުމަށް ހަމަޖެހިފައިވަނީ ކޭމްޕްނޯގައި އަލްވެސްއާއި ދެކޮޅަށް ކުޅޭ މެޗުގައެވެ. މިމަހު 21 ވަނަ ދުވަހު ކުޅުމަށް ހަމަޖެހިފައިވާ އެމެޗު ފެށުމަށް ހަމަޖެހިފައިވަނީ އެރޭ 20:00 ގައެވެ.
