ސްޕެނިޝް ލަލީގާގައި ހެޓްރިކް ހެދި އެންމެ ދުވަސްވީ ކުޅުންތެރިއަކަށް ރެއަލް ބެޓިސްއަށް ކުޅެމުން އަންނަ ސްޕެއިންގެ އުމުރުން 38 އަހަރުގެ ހުވާކީން ވެއްޖެއެވެ.
ހުވާކީން ހެޓްރިކް ހަދާފައިވަނީ ރޭ އެތުލެޓިކް ބިލްބާއޯއާއި ދެކޮޅަށް ކުޅުނު މެޗުގައެވެ. ހުވާކީންގެ ހެޓްރިކް މެޗުގެ ފުރަތަމަ 20 ވަނަ މިނަޓް ތެރޭގައި ފެނިގެން ގޮސްފައިވާއިރު، އޭނާ މީގެ ކުރިން ހެޓްރިކެއް ހަދާފައެއް ނުވެއެވެ.
"މިއީ ޙަޔާތުގައިވެސް ހެދުނު ފުރަތަމަ ހެޓްރިކް. ދެން އިތުރު ހެޓްރިކެއް ހެދޭނެކަމަށް ޤަބޫލެއްވެސް ނުކުރަން." ހުވާކީން ބުންޏެވެ.
މީގެއިތުރުން ހުވާކީން ބުނީ، އޭނާއަކީ ގޯލާ މާ ރައްޓެހި މީހެއް ނޫންނަމަވެސް އެއުމުރުގައި ވާދަވެރި ޓީމަކާއި ދެކޮޅަށް ހެޓްރިކެއް ހަދާލެވުމުން އުފާވާކަމަށެވެ.
ޔޫރަޕްގެ ގަދަ 5 ލީގުގައި ހެޓްރިކް ހެދި އެންމެ ދުވަސްވީ ކުޅުންތެރިން:
- ސްޕެއިންގެ ހުވާކީން - 38 އަހަރާއި 140 ދުވަސް.
- ޖަރުމަނުގެ ކްލޯޑިއޯ ޕިޒާރޯ - 37 އަހަރާއި 151 ދުވަސް.
- އިންގްލޭންޑްގެ ޓެޑީ ޝެރިންގަމް - 37 އަހަރާއި 146 ދުވަސް.
- އިޓަލީގެ ސިލްވިއޯ ޕިއޯލާ - 37 އަހަރާއި 51 ދުވަސް.
- ފްރާންސްގެ ޓޯނީ ކަސްކަރީނޯ - 37 އަހަރާއި 31 ދުވަސް.
ރޭގެ މެޗު ރެއަލް ބެޓިސްއިން ކާމިޔާބުކޮށްފައިވަނީ 3-2 ގެ ނަތީޖާއަކުންނެވެ. ދެޓީމުގެ ފަރާތުންވެސް ވަރަށް ހަމަހަމަ ކުޅުމެއް ފެނިގެންދިޔަ މިމެޗުގައި އެތުލެޓިކޯ ބިލްބާއޯއިން ޖެހި ދެލަނޑު ކާމިޔާބުކޮށްދީފައިވަނީ އިނާކީ ވިލިއަމްސްއާއި ޔޫރީ ބާޗީޗެއެވެ.
16 މެޗުން ލިބުނު 22 ޕޮއިންޓާއެކު ރެއަލް ބެޓިސް އޮތީ ތާވަލްގެ 11 ވަނާގައެވެ.
