ބޭރުގައި ކިޔަވާ ދިވެހި ކުދިންގެ ހާލު ދަނީ ކަމާއި ގުޅޭ އިދާރާތަކާއި ގުޅިގެން ގާތުން ބަލަމުންދާކަމަށް މިނިސްޓްރީ އޮފް ހަޔަރ އެޑިއުކޭޝަނުން ވިދާޅުވެއްޖެއެވެ.
މިއަދު ކުރެއްވި ޓްވީޓެއްގައި ހަޔަރ އެޑިއުކޭޝަނުން ވިދާޅުވީ، ހަލުވިކަމާއެކު ފެތުރެމުންދާ ކޮރޯނާ ވައިރަސްއާ ގުޅިގެން، ބޭރު ޤައުމުތަކުގައި ކިޔަވާ ދިވެހި ކުދިންގެ ހާލު ކަމާއި ގުޅޭ އިދާރާތައް މެދުވެރިކޮށް ކަށަވަރު ކުރަމުން އަންނަ ކަމަށެވެ.
އަދި ޗައިނާގައި ތިބި ދިވެހި ކިޔަވާ ކުދިން ކޮންސިއުލާ ހޮޓްލައިން ނަންބަރު 7983400 އާ ގުޅުއްވުމަށްވެސް އެޑިއުކޭޝަނުން އެދިފައިވެއެވެ. މީގެއިތުރުން އެހެން ޤައުމުތަކުގައި އުޅޭ ކިޔަވާކުދިންވެސް އެޤައުމެއްގެ ކޮންސިއުލާ އޮފީސްތަކާއި ގުޅުމަށްވެސް އެމިނިސްޓްރީން ވަނީ އިލްތިމާސް ކޮށްފައެވެ.
ކޮރޯނާ ވައިރަސް ދުނިޔޭގެ އެކި ހިސާބުގައި ހަލުވިކަމާއެކު ފެތުރެމުންދާއިރު، ޗައިނާގެ އިތުރުން، ތައިލެންޑް، ޖަޕާން، ސައުދީއެރޭބިއާ، ސިންގަޕޫރު އަދި ވިއެޓްނާމުންވެސް މިވައިރަސްވަނީ ފެނިފައެވެ.
ޗައިނާއިން 500 އަށްވުރެ ގިނަ މީހުންގެ ގައިން ކްރޯނާ ވައިރަސް ފެނިފައިވާއިރު މިހާތަނަށް މިބަލީގައިވަނީ 17 މީހަކު މަރުވެފައެވެ. މިވައިރަސް ވަނީ ޗައިނާގެ 30 ޕްރޮވިންސަކަށް ފެތުރިފައިވާއިރު، އެގައުމުން ވަނީ ވައިރަސް ފެތުރުން ހުއްޓުވުމުގެ ގޮތުން ވޫހާން އާއި އިތުރު 13 ސިޓީއެއް ކަރަންޓީނުކޮށްފަ އެވެ.
