ކޮރޯނާ ވައިރަސް ޗައިނާ ޓޫރިސްޓަކާއެކީ ރާއްޖެ އައުމުގެ ފުރުސަތު ވަރަށްބޮޑުކަމަށް މަޖިލީހުގެ ކުރީގެ މެންބަރު އަލްހާން ފަހުމީ ވިދާޅުވެއްޖެއެވެ.
ކަންބޮޑުވުން ފާޅުކުރައްވާ މިއަދު ކުރެއްވި ޓްވީޓެއްގައި އަލްހާން ވިދާޅުވީ، ކޮރޯނާ ވައިރަސް ޗައިނާ ޓޫރިސްޓަކާއެކީ ރާއްޖެ އައުމުގެ ފުރުސަތު ވަރަށްބޮޑުކަމަށާއި، ޗައިނާގެ ފަތުރުވެރިން ރާއްޖެ އައުން ވަގުތީ ގޮތުން ނަމަވެސް ހުއްޓުވަންޖެހޭކަމަށެވެ.
އަދި ކޮރޯނާ ވައިރަސް ރާއްޖެ އަތުވެދާނެކަމުގެ ބިރު ބޮޑުއިރު، ސަރުކާރުން އަޅަންޖެހޭ ފިޔަވަޅު ނާޅާތީ ކަންބޮޑުވާކަމަށްވެސް އަލްހާންގެ މިޓްވީޓްގައި ވިދާޅުވެފައިވެއެވެ.
ބާރު ސްޕީޑެއްގައި ކޮރޯނާ ވައިރަސް ފެތުރެމުންދާއިރު މި ވައިރަސް ޖެހިގެން މިހާތަނަށް 80 މީހުން ވަނީ މަރުވެފަ އެވެ. އަދި އެކި ގައުމުތަކުން 1،700 އަށް ވުރެ ގިނަ މީހުންގެ ގައިން އެ ވައިރަސް މިހާރު ވަނީ ފެނިފައެވެ.
ކޮރޯނާވައިރަހަށް ޝައްކުވާ މީހަކު މިހާތަނަށް ރާއްޖެއިން ފެނިފައި ނުވާކަމަށް ހެލްތް ޕޮރޮޓެކްޝަން އެޖެންސީ (އެޗްޕީއޭ) އިންވަނީ ވިދާޅުވެފައެވެ. އަދި މިވައިރަސް ރާއްޖޭގައި ފެތުރި ފުޅާ ވެއްޖެ ނަމަ، މާލެ ކައިރީ އޮތް ފުނަދޫގައި އައިސޮލޭޝަން ފެސިލިޓީ އެއް ގާއިމް ކުރާނެ ކަމަށްވެސް ހެލްތު މިނިސްޓަރު އަބްދުﷲ އަމީންވަނީ ވިދާޅުވެފައެވެ.
