ރެއަލްމެޑްރިޑަށް ކުޅެމުން އަންނަ ބްރެޒިލްގެ ޑިފެންޑަރު މާސެލޯ ވިއޭރާ ރެއަލްމެޑްރިޑް ޖާޒީގައި 500 މެޗު ހަމަކޮށްފިއެވެ.
މާސެލޯގެ 500 ވަނަ މެޗުގައި ރޭ ކުޅެފައިވަނީ ޒަރަގޯޒާއާއި ދެކޮޅަށެވެ. ކޮޕަޑެލްރޭ މުބާރާތުގައި ކުޅެވުނު މިމެޗު ރެއަލްމެޑްރިޑް ފަޞޭޙަކަމާއެކު ކާމިޔާބުކުރީ 0-4 ގެ ނަތީޖާއަކުންނެވެ. ރެއަލްމެޑްރިޑުގެ ލަނޑުތައް ޖަހާދީފައިވަނީ ވެރޭން، ލޫކަސް ވަޒްކަޒް އަދި ވިނިޝިއަސްގެ އިތުރުން ބެންޒެމާއެވެ.
މާސެލޯގެ މިކާމިޔާބީގެ ހަނދާނެއްގެ ގޮތުން ރެއަލްމެޑްރިޑްގެ ރައީސް ޕެރޭޒްވަނީ 500 ނަންބަރު ޖަހާފައިވާ ޖާޒީއެއް މާސެލޯއަށް ހަދިޔާކޮށްފައެވެ.
ބްރެޒިލްގެ ފްލޫމިނެންސް ދޫކޮށް މާސެލޯ ރެއަލްމެޑްރިޑާއި ގުޅުނީ 2007 ވަނަ އަހަރުގައެވެ. މާސެލޯއަކީ މިހާރު ރެއަލްމެޑްރިޑްގެ ވައިސް ކެޕްޓަންއެވެ. އަދި މާސެލޯވަނީ ރެއަލްމެޑްރިޑާއެކު ގިނަ ކާމިޔާބީތަކެއް ހޯދާފައެވެ. އޭގެތެރޭގައި 4 ޗެމްޕިއަންސް ލީގު، 4 ކްލަބު ވޯލްޑްކަޕް، 3 ސުޕަރކަޕް، 4 ލަލީގާ، އަދި 2 ކޮޕަޑެލްރޭގެ އިތުރުން 2 ސުޕަރކޯޕާ ހިމެނެއެވެ.
މާސެލޯ ރެއަލްމެޑްރިޑްގައި މިހޭދަކުރި 13 ސީޒަންގައި އޭނާ މިހާތަނަށް ކުޅެދިން 500 މެޗުގެތެރެއިން 345 މެޗުން ރެއަލްމެޑްރިޑްވަނީ މޮޅުވެފައެވެ. އަދި މި 500 މެޗުން 36 ލަނޑު މާސެލޯ ރެއަލްމެޑްރިޑަށް ކާމިޔާބުކޮށްދީފައިވެއެވެ.
