ބާސެލޯނާއަށް ކުޅެމުން އަން ސްޕެއިން ފޯވާޑު ކާލެސް ޕެރޭޒް އެކްލަބު ދޫކޮށް އިޓަލީގެ ރޯމާއަށް ބަދަލުވެއްޖެއެވެ.
1 މިލިއަން ޔޫރޯއަށް ލޯނު އުޞޫލުން ޕެރޭޒް ރޯމާއާއި ގުޅުނީ މިސީޒަންގެ ނިޔަލަށެވެ.
އުމުރުން 21 އަހަރުގެ ޕެރޭޒް ބާސެލޯނާއަށް މިސީޒަންގައި 12 މެޗު ކުޅެފައިވާއިރު، 7 މެޗެއްގެ ފުރަތަމަ 11 ގައި ހިމެނިފައިވެއެވެ. ޕެރޭޒްއަށް ޓީމުން ފުރުޞަތު ބޮޑު ވެގެންދިޔައީ ބާސެލޯނާގެ ކުރިއަށް ކުޅެމުން އަންނަ ގިނަ ކުޅުންތެރިން އަނިޔާވުމާއި ގުޅިގެންނެވެ. އޭގެ ތެރޭގައި ޑެމްބެލޭއާއި ސުއަރޭޒް ހިމެނެއެވެ.
ލިބުނު މަދު ފުރުޞަތުގައި ބާސެލޯނާއަށް މުހިންމު ކުޅުމެއް ކުޅެދިން ޕެރޭޒްވަނީ ރެއަލް ބެޓިސް އަތުންނާއި އިންޓަރ މިލާން އަތުން ބާސެލޯނާ މޮޅުވި މެޗުގައި ލަނޑު ޖަހައިދީފައެވެ.
މިސީޒަންގެ ލަލީގާގައި ޕެރޭޒް 10 މެޗު ކުޅެފައިވާއިރު، 1 ލަނޑު ޖަހައި 3 އެސިސްޓް ހަދާފައިވެއެވެ.
ބާސާ އެކަޑަމީއިން ތަމްރީނު ވެގެންއައި ޕެރޭޒްއަކީ ސްޕެއިންގެ 21 އަހަރުން ދަށުގެ ޤައުމީ ޓީމުގައި ހިމެނޭ ކުޅުންތެރިއެކެވެ. އޭނާ ބާސެލޯނާގެ ބޮޑު ޓީމާއި ގުޅުނީ މިދިޔަ އަހަރުއެވެ.
