ސޯސަންމަގުގައި ހިނގި ފޭރުމުގެ މައްސަލައަކާއި ގުޅިގެން ސޯސަންމަގުން ހަތަރު މީހަކު ހައްޔަރުކޮށްފިއެވެ.
ފުލުހުން މިރޭ ވިދާޅުވީ، ފޭރުމުގެ މައްސަލައެއް ހިނގައިގެން އުޅޭކަމުގެ މަޢުލޫމާތު ފުލުހުންނަށް ލިބުމާއި ގުޅިގެން، ގަލޮޅު ޕޮލިހުން ހަރަކާތްތެރިވެފައިވާ ކަމަށެވެ.
"ފުލުހުން އެސަރަހައްދަށް ގޮސް 28އ، 38އ، 22އ، އަދި 49 އަހަރުގެ މީހެއް ހައްޔަރުކޮށްފައިވޭ." ފުލުހުން ވިދާޅުވިއެވެ.
މި މައްސަލައިގައި ހައްޔަރުކުރި އެންމެންނަކީވެސް ދިވެހި ފިރިހެނުން ކަމަށާއި، މީހުން ހައްޔަރުކުރުމުގެ އިތުރުން ފޭރުނު ފޯނުވެސް ހޯދާފައިވާކަމަށް ފުލުހުން ވިދާޅުވިއެވެ.
ފޭރުމުގެ މައްސަލަތައް ވޭތުވެދިޔަ އަހަރުގެ ފަހުކޮޅުން ފެށިގެން އިތުރުވެފައިވާއިރު، ފޭރުމާއި ވައްކަމުގެ މައްސަލަތައް މަދުކުރުމަށް ފުލުހުން ގެންދަނީ ޚާއްޞަ މަސައްކަތްތަކެއް ކުރަމުންނެވެ.
