މިއަހަރު ކުޅުމަށް ހަމަޖެހިފައިވާ ޔޫރޯ 2020 އަންނަ އަހަރު ކުޅޭގޮތަށް ހަމަޖެއްސި ނަމަވެސް މުބާރާތުގެ ނަމަށް ބަދަލެއް ނުގެންނާނެކަމަށް ޔޫއެފާއިން ހާމަކޮށްފިއެވެ.
ޔޫއެފާގެ އެގްޒެކިއުޓިވް ކޮމިޓީގެ ވީޑިއޯ ކޮންފެރެންސް ބައްދަލުވުމެއްގައި ޔޫއެފާއިން މިގޮތަށް ނިންމާފައިވާއިރު، ޔޫރޯއަށް 60 އަހަރު ފުރޭ މިމުބާރާތް ވަރަށް ކުލަގަދަކޮށް ކުރިއަށް ގެންދަން ޔޫއެފާއިންއައީ ރާވަމުންނެވެ. އަދި މިނިންމުމަކީ ޔޫއެފާގެ އަސްލު ވިޝަން ބަދަލެއް ނުގެނެސް ކުރިއަށް ގެންދަން ލިބުނު ފުރުޞަތެކެވެ.
"މުބާރާތް އަންނަ އަހަރަށް ފަސްކޮށްފައިވާއިރު، މިއަހަރު މުބާރާތް ކުރިއަށް ގެންދިއުމަށްޓަކައި ވަރަށް ގިނަ ތަކެތި ވަނީ ތައްޔާރުކުރެވިފައި، އެހެންކަމުން މުބާރާތުގެ ނަމަށް ބަދަލެއް ގެނެސްފިނަމަ އެހުރިހާ އެއްޗެސްވެސް ބޭކާރު ވެގެންދާނެ. އަދި އަލުން ޖެހޭނީ އެއެއްޗެހި ތައްޔާރުކުރަން." ޔޫއެފާއިން ބުންޏެވެ.
ޔޫރޯއަކީ ޔޫރަޕްގެ ޤައުމުތަކުގެ މެދުގައި ކުޅެވޭ އެންމެ ފޯރިގަދަ މުބާރާތެވެ. މިމުބާރާތުގެ އެންމެފަހުގެ ޗެމްޕިއަންއަކީ ޕޯޗުގަލްއެވެ.
ޔޫރޯ 2020 ކުޅެން ހަމަޖެހިފައި އޮތީ މިއަހަރުގެ ޖޫން 12 އިން ޖުލައި 12 އަށެވެ. އެހެންނަމަވެސް ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 އާއި ގުޅިގެން މިމުބާރާތްވަނީ 2021 ވަނަ އަހަރުގެ ޖޫން 11 އިން ޖުލައި 11 އަށް ކުޅޭގޮތަށް ފަސްކޮށްފައެވެ.
