ސްޕެނިޝް ލަލީގާގައި މިރޭ ބާސާ ސެލްޓާއާއި ދެކޮޅަށް ކުޅޭ މެޗުގައި ބާސާ ފުރަތަމަ 11 އިން އާންމުކޮށް ފެންނަ 8 ކުޅުންތެރިން ނުފެންނާނެކަމަށް ބާސާއިން ބުނެފިއެވެ.

ސެލްޓާ ދަނޑުގައި މިރޭ ރާއްޖެ ގަޑިން 11:45 ގައި ފެށިގެންދާ މިމެޗުގައި ބާސާގެ މެސީ، ސުއަރޭޒް، ޕީކޭ، އަލްބާ، ސާޖިއޯ، ރަކިޓިޗް، ބުސްކެޓް އަދި ކީޕަރު ސްޓެގެންވެސް ނުކުޅޭނެއެވެ.

83 ޕޮއިންޓާއެކު ބާސާއަށް މިހާރުވެސް އޮތީ މިސީޒަންގެ ލަލީގާ ކަށަވަރުވެފައެވެ. ބާސާގެ އަމާޒު މިހާރު ޗެމްޕިއަންސް ލީގަށް ހިފާފައިވާއިރު ސެމީގައި ކުޅުނު ފުރަތަމަ މެޗުން ލިވަޕޫލްއަތުން މޮޅުވެފައިވަނީ 3-0 ގެ ނަތީޖާއަކުންނެވެ. އަދި މިމެޗުގެ ދެވަނަ ލެގު އަންނަ އަންގާރަ ދުވަހުގެ ރޭ އެންފީލްޑްގައި ކުޅެވޭއިރު ބާސާއިން ކުޅުންތެރިންނަށް ރެސްޓްދެނީ އެރޭގެ މެޗަށް ތައްޔާރުވުމަށެވެ.

ކުޓީނިއޯ، ޑެމްބެލޭ، ވިދާލް، އާތަރ، އަދި ކީޕަރު ސިލެސެންއަކީ މިރޭގެ ފުރަތަމަ 11 އިން ފެނިގެންދާނެ ބައެއް ކުޅުންތެރިންކަމަށް ބާސާއިން ބުނެއެވެ.

އެހެން މެޗުތަކެކޭވެސް އެއްފަދައިން މިރޭވެސް ނިކުންނާނީ 3 ޕޮއިންޓް ހޯދުމުގެ އުންމީދުގައި ކަމަށާއި މިދިޔަ ތިން ހަފްތާގައި ޓީމުން ނުހަނު ބުރަ މަސައްކަތްކޮށްފައިވާއިރު މިއީ ކޮންމެހެންވެސް ގެންނަންޖެހޭ ބަދަލުތަކެއްކަމަށް ކޯޗު ވަލްވާޑޭ ބުނެފައިވެއެވެ.

" ފުރަތަމަ ލެގުގައި ލިވަޕޫލްއާއި ދެކޮޅަށް ކުޅުނު މެޗުން ލިބުނީ ރަނގަޅު ނަތީޖާއެއް. އަހަރެމެން ލިވަޕޫލްގެ ކުޅުން އާންމުކޮށް ބަލަން. އެހެންވެ އެމީހުންގެ ކުޅަދާނަ ކަމާއި ހުނަރު އިނގޭ. އަދި ސެމީ އެއް ނުނިމޭ. " ވަލްވާޑޭ ބުންޏެވެ.

ސެލްޓާގައި ބާސާ އެންމެ ފަހުން ކުޅުނު ތިން މެޗުގެ ތެރެއިން ދެމެޗުން ބަލިވެ އެއްމެޗުވަނީ އެއްވަރުވެފައެވެ. " މިދިޔަ އަހަރުވެސް އަހަރެމެން މިތަނުގައި ބަލިވި " ވަލްވާޑޭ ބުންޏެވެ.

އަނެއް ކޮޅުން ސެލްޓާ އޮތީ ބާސާ މެޗަށް ތައްޔާރުވެފައެވެ. ސަސްޕެންޝަންގެ ސަބަބުން ރަކިޓިޗް އަށާއި ބުސްކެޓްއަށް ނުކުޅެވޭއިރު މިއީ ލިބޭ ރަނުގެ ފުރުޞަތެއްކަމަށާއި، ބައްދަލުކުރާ ހުރިހާ ޓީމެއްވެސް ބަލިކުރެވޭނެކަމަށް ޤަބޫލުކުރާކަމަށް ސެލްޓާގެ އޮފިޝިއަލް ވެބްސައިޓްގައިވެއެވެ.