ރާއްޖޭގައި ކޮވިޑް-19 ޖެހިގެން ރޭ ނިޔާވި މީހާ ވަޅުލަައިފި އެވެ.
ރޭ ނިޔާވި 80 އަހަރުގެ މީހާގެ ޖަނާޒާގެ ކަންތައްތައް ކޮށްފައިވަނީ އެމްއެންޑީއެފް ފިރިހެން ސިފައިންނެވެ. މި މީހާ ނިޔާވީ ދަރުމަވަންތަ ހޮސްޕިޓަލުގެ ޑީއެޗް11 ގެ އައިސީޔޫގައި ފަރުވާ ދެމުން ދަނިކޮށެވެ.
އޭނާ ނިޔާވީ ރޭ 11:20 ގައި ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) ވަނީ ވިދާޅުވެފައެވެ. ކޮވިޑަށް ޕޮޒިޓިވް ވެގެން ދަރުމަވަންތަ ޑީއެޗް11 ގައި އޭނާއަށް ފަރުވާ ދޭން ފަށާފައިވަނީ އޭޕްރީމް މަހުގެ 20 ވަނަ ދުވަހުއެވެ.
މިމީހާ އަކީ އެހެން ބަލިތަކަކަށް ފަރުވާ ދެމުންދިޔަ މީހެކެވެ. އައިޖީއެމްއެޗްގެ ޑރ. މުސާ ހުސައިން ވިދާޅުވީ ލޭ މައްޗަށް ދިއުން، ހަކުރު ބަލި، ކޮލެސްޓްރޯލް މަތިވުން ފަދަ ބަލިތައް ވެސް އެމީހާގެ ހުރިކަމަށެވެ.
މި މީހާ ވަޅުލާފައިވަނީ ހުޅުމާލެ ސަހަރާގައެވެ. މިއީ ކޮވިޑް-19 ޖެހިގެން ރާއްޖެއިން ނިޔާވި 3 ވަނަ މީހާއެވެ. ކޮވިޑް-19 ޖެހިގެން ރާއްޖެއިން އެންމެ ފުރަތަމަ ނިޔާވެފައިވަނީ އުމުރުން 83 އަހަރުގެ ދިވެހި އަންހެނެކެވެ. ދެވަނައަށް މިބަލީގައި ރާއްޖެއިން ނިޔާވެފައިވަނީ 33 އަހަރުގެ ބަންގްލަދޭޝްގެ ފިރެހެނެކެވެ.
