އާޖެންޓީނާގެ ތަރި ލިއޮނަލް މެސީ އަދި ޕޯޗުގަލްގެ ތަރި ކްރިސްޓިއާނޯ ރޮނާލްޑޯ ފުޓްބޯޅައިގެ ދުނިޔޭގައި ދައްކަމުންދިޔަ މޮޅު ކުޅުމުގެ ސަފްޙާތަކަށް ނިމުން އަންނަމުންދާކަމަށް އާސެނަލްގެ ކުރީގެ ރައީސް އާސެން ވެންގާ ބުނެފިއެވެ.

ޓޯކްސްޕޯޓްއަށް ދިން އިންޓަރވިއުއެއްގައި ވާހަކަ ދައްކަމުން ވެންގާ ބުނީ، މެސީ އަދި ރޮނާލްޑޯ ފެންވަރުގެ ކުޅުންތެރިން މިހާތަނަށް ފެނިފައިނުވާކަމަށާއި، އެހެންނަމަވެސް އެދެކުޅުންތެރިންގެވެސް ކެރިއަރު މިހާރު ނިމުމަކާ ގާތްވެފައިވާކަމަށެވެ.

އަދި އެކުޅުންތެރިން ރިޓަޔާރ ކުރިނަމަވެސް ފުޓްބޯޅަ ކުރިއަށް ދާނެކަމަށާއި، ނަމަވެސް ގޭމަށް ބޮޑު ބަދަލެއް އަންނާނެކަމަށް ވެންގާ ބުންޏެވެ.

އެހެންނަމަވެސް ޒުވާން މޮޅެތި ކުުޅުންތެރިން މިހާރުވެސް ފުޓްބޯޅައިގެ ދުނިޔޭގައި އެބަހުރިކަމަށްވެސް ވެންގާ ބުނެފައިވާއިރު، ނެމާއާއި އެމްބާޕޭ އޭނާ ފާހަގަކުރިއެވެ.

ރޮނާލްޑޯއަށް މިދިޔަ ފެބްރުއަރީމަހު އުމުރުން 35 އަހަރު ވެފައިވާއިރު، މެސީގެ އުމުރުން 33 އަހަރު ފުރޭނީ މިއަހަރުގެ ޖޫންމަހުއެވެ.

ދުނިޔޭގައި މިހާރު އެންމެ މޮޅު ދެކުޅުންތެރިންގެ ގޮތުގައި އެތަށްބަޔަކު ޤަބޫލުކުރާ މިދެކުޅުންތެރިންނަކީ ފުޓްބޯޅައިގެ ތާރީޚުގައިވެސް އުފެދުނު އެންމެ މޮޅު ދެކުޅުންތެރިންކަމަށް ޤަބޫލުކުރާ މީހުން މަދެއް ނުވާނެއެވެ. ދުނިޔޭގެ މޮޅު ކުޅުންތެރިޔާއަށް ކޮންމެ އަރަކު އަރުވާ ބެލޮންޑިއޯ އެވޯޑު މިދެކުޅުންތެރިން ވެގެން ހާސިލްކުރާތާ އެތަކެއް ދުވަސް ވެއްޖެއެވެ.

ބެލޮންޑިއޯ އެވޯޑު މެސީ މިހާތަނަށް 6 ފަހަރެއްގެ މަތިން ހޯދާފައިވާއިރު، ރޮނާލްޑޯވަނީ 5 ފަހަރެއްގެ މަތިން މިއެވޯޑު ހޯދާފައެވެ. 2008 ވަނަ އަހަރުން ފެށިގެން 2019 އާއި ހަމައަށް ބަލާލާއިރު މެސީ އަދި ރޮނާލްޑޯގެ އިތުރުން މިއެވޯޑު ލިބިފައިވަނީ އެންމެ ކުޅުންތެރިއަކަށެވެ. އެއީ 2018 ވަނަ އަހަރުއެވެ. އެއަހަރު މިއެވޯޑު ޙާސިލްކޮށްފައިވަނީ ކޮރޭޝިއާގެ މެދުތެރެއަށް ކުޅެމުން އަންނަ ލޫކާ މޮޑްރިޗެވެ.