ރޮބާޓް ލެވެންޑޯސްކީ މިސީޒަންގައި ކާމިޔާބުކޮށްދިން 40 ވަނަ ލަނޑާއެކު ބަޔާން މިއުނިކުން ތާވަލްގެ އެއްވަނާގައި ހަމަޖެހިލައިފިއެވެ.
ޖަރުމަން ބުންޑެސްލީގާގައި ރޭ ޔޫނިއަން ބާލިންއާއި ދެކޮޅަށް ކުޅުނު މެޗު ބަޔާންއިން ކާމިޔާބުކޮށްފައިވަނީ 0-2 ނަތީޖާއަކުންނެވެ.
ޔޫނިއަން ބާލިންގެ ދަނޑުގައި ކުޅެވުނު މިމެޗުގެ ކުރީކޮޅު އެކްލަބުންވަނީ ބަޔާން ރަނގަޅު ފައިޓެއްދީފައެވެ. އެގޮތުން މެޗުގައި ފެނިގެންދިޔަ ފުރަތަމަ ނުރައްކާތެރި ހަމަލާވެސް އުފެއްދީ ޔޫނިއަންއިންނެވެ. އޭރިއާތެރެއިން ފޮނުވާލި މިހަމަލާ ދިފާޢުކުރީ ބަޔާންގެ ކީޕަރެވެ.
މިމެޗުގެ ފުރަތަމަ ލަނޑު ބަޔާނުން ޖަހާފައިވަނީ ލިބުނު ޕެނަލްޓީއަކުން ލެވެންޑޯސްކީއެވެ. މެޗުގެ 40 މިނަޓްގައި ލެވެންޑޯސްކީ ކާމިޔާބުކޮށްދިން މިލަނޑަކީ އޭނާ މިސީޒަންގައި ބަޔާންއަށް ކާމިޔާބުކޮށްދިން 40 ވަނަ ލަނޑެވެ. ލެވެންޑޯސްކީ 40 ލަނޑު ހަމަކޮށްފައިވަނީ މިސީޒަންގައި ބަޔާންއަށް ކުޅެދިން 34 މެޗުންނެވެ. މިއީ ލެވެންޑޯސްކީ ޖެހިޖެހިގެން 40 ލަނޑު ހަމަކުރި ފަސްވަނަ ސީޒަންއެވެ.
The first player in Europe's top 5️⃣ leagues to reach 4️⃣0️⃣ goals for the season is... ?
Well, duh ?@lewy_official #FCUFCB pic.twitter.com/zaP12qb8Ar
— FC Bayern English (@FCBayernEN) May 17, 2020
ބަޔާންގެ ދެވަނަ ލަނޑު މެޗުގެ 80 ވަނަ މިނަޓްގައި ފެނިގެންގޮސްފައިވާއިރު، މިލަނޑު އެކްލަބަށް ކާމިޔާބުކޮށްދިނީ ޕަވާޑެވެ. މިމޮޅާއެކު އެންމެފަހުގެ ޗެމްޕިއަން ބަޔާންވަނީ 4 ޕޮއިންޓްގެ ލީޑަކާއެކު ތާވަލްގެ އެއްވަނާގައި ހަމަޖެހިލާފައެވެ. ބަޔާންއަށް 58 ޕޮއިންޓް ލިބިފައިވާއިރު، 54 ޕޮއިންޓާާއެކު ތާވަލްގެ ދެވަނާގައި އޮތީ ޑޯޓުމުންޑެވެ.
ކޮވިޑް-19 އާއި ގުޅިގެން މެދުކަނޑާލާފައިވާ ޖަރުމަނު ފުޓްބޯޅަ އަލުން ފެއްޓުމަށް ސަރުކާރުން ހުއްދަ ދީފައިވަނީ ހަރުކަށި ޤަވާޢިދުތަކާއެކުގައެވެ. ސަޕޯޓަރުން ނުވައްދާ މެޗުތައް ކުޅެން ހުއްދަދީފައިވާއިރު، ބަދަލުކުޅުންތެރިންނާއި އޮފިޝަލުންވެސް ހުންނަންޖެހެނީ ސޯޝަލް ޑިސްޓެސްއާއެކުގައެވެ.
ކޯޗުންނާއި ކުޅުންތެރިންވެސް ކޮވިޑް-19 އަށް ޓެސްޓް ކުރުމަށްފަހުވަނީ އެކްލަބުތަކުގެ ހޮޓެލްގައި މިހަފްތާގައި ކަރަންޓީނު ކުރެވިފައެވެ. އަދި ހޮޓެލް ދޫކޮށްދިއުން މަނާކޮށްފައިވާއިރު، މެޗުގެ އިތުރުން ދެވޭނީ ފަރިތަކުރުންތަކުގައި ބައިވެރިވުމަށް އެކަންޏެވެ.
