ކޮވިޑް-19 ފެތުރުން ކޮންޓްރޯލް ކުރަން ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އެކުލަވާލާފައިވާ އުސޫލުތަކާއި ހިލާފަށް ހުރި 20 ތަނެއް ބަންދުކޮށްފިއެވެ.
އެޗްޕީއޭ އިން މިއަދު ކުރެއްވި ޓްވީޓެއްގައި ވިދާޅުވެފައިވަނީ އިއްޔެ 146 ތަނެއް ބަލާ ފާސްކޮށްފައިވާ ކަމަށާއި އެތަނުން އުސޫލުތާއި ހިލާފަށް ހުރި 20 ތަނެއް ބަންދު ކޮށްފައިވާކަމަށެވެ.
އެޗްޕީއޭއިން ބަންދު ކޮށްފައިވަނީ 8 ސެލޫންއާއި 7 ފިހާރައަކާއި 3ރެސްޓޯރެންޓާއި އަދި 2 ޖިމެވެ.
އެޗްޕީއޭ އިން 28 ޖުލައި 2020 ގައި ނެރިފައިވާ އިއުލާނުގައި ވިދާޅުވެފައި ވަނީ، ކޮވިޑް-19 އާއި ގުޅިގެން އައު ޢާއްމު ޙާލަތަށް ރުޖޫޢަވުމަށްޓަކައި ޢާއްމު ޚިދުމަތްދޭ ތަންތަނުގައި ރައްކާތެރިކަމާއެކު ޚިދުމަތްދިނުމުގެ އިންތިޒާމް ހަމަޖެއްސުމަކީ މިބަލި ފެތުރުން މަދުކުރުމަށް އެޅޭ ވަރަށް މުހިއްމު ފިޔަވަޅެއް ކަމަށެވެ.
އަދި މިގޮތުން މިފަދަ ތަންތަނުން ޢާއްމުފަރާތްތަކަށް ޚިދުމަތް ފޯރުކޮށްދޭންވާނީ، ކޮވިޑް-19 އާއި ގުޅިގެން އެޗްޕީއޭ އިން ޢާއްމުކޮށްފައިވާ އުޞޫލުތަކާ އެއްގޮތަށް ކަމަށް އެޗްޕީއޭ އިން ކުރެއްވި އިއުލާނެއްގައި ވިދާޅުވެފައި ވެއެވެ.
