އަނިޔާގެ ސަބަބުން ޕީއެސްޖީގެ ކީޕަރު ކޭލާ ނަވާސްއަށް މިސީޒަންގެ ޔޫއެފާ ޗެމްޕިއަންސް ލީގު ސެމީ ފައިނަލް ގެއްލިއްޖެކަމަށް ރިޕޯރޓްތައް ބުނެފިއެވެ.
ކީޕަރު ނަވާސްއަށް އަނިޔާވެފައިވަނީ އެޓަލާންޓާއާއި ދެކޮޅަށް ކުޅުނު ކުއާޓާރ ފައިނަލް މެޗުގައެވެ. އަދި އެމެޗުގެ 79 ވަނަ މިނަޓްގައި ނަވާސްވަނީ ބަދަލުކޮށްފައެވެ.
އުމުރުން 33 އަހަރުގެ ނަވާސްގެ އަނިޔާވެފައިވަނީ ކަނާތު ފައިގެ ފަލަމަސްގަނޑަށެވެ. އަދި ސެމީއާއި ދޭތެރޭ ކުޑަ ދުވަސްކޮޅެއް އޮތްއިރު، ސެމީގެ ކުރިން އޭނާ ރަނގަޅުވާނެކަމަކަށް ނުބެލެވެއެވެ. އިއްޔެ ޕީއެސްޖީއިން ކުރިއަށް ގެންދިޔަ ފަރިތަކުރުންތަކުގައިވެސް ނަވާސް ބައިވެރިވެފައެއް ނުވެއެވެ.
ނަވާސްއަށް އަނިޔާވެފައިވާކަން ޕީއެސްޖީއިން ހާމަކުރިނަމަވެސް ރަނގަޅުވާން ކިހާ މުއްދަތެއް ނަގާނެކަމަށް ހާމަކޮށްފައެއް ނުވެއެވެ.
ސްޕެއިންގެ ރެއަލްމެޑްރިޑް ދޫކޮށް ޕީއެސްޖީއާއި ނަވާސް ގުޅުނީ 2019 ވަނަ އަހަރުގެ ސެޕްޓެމްބަރު މަހުއެވެ. ޕީއެސްޖީއާއެކު ނަވާސް ހަދާފައިވަނީ ހަތަރު އަހަރު ދުވަހުގެ އެއްބަސްވުމެކެވެ.
Keylor Navas will miss out on PSG's Champions League semi-final vs. Leipzig on Tuesday due to injury, reports @RMCSport pic.twitter.com/Dv7ermWcaj
— B/R Football (@brfootball) August 16, 2020
ޗެމްޕިއަންސް ލީގު ސެމީގައި ޕީއެސްޖީ ކުޅުމަށް ހަމަޖެހިފައިވާ މެޗަށް މިހާރުވަނީ 48 ގަޑިއިރަށްވުރެ ކުޑަތަންވެފައެވެ. އެހެންކަމުން އެމެޗަށް ނަވާސް ފިޓްވާނެކަމާމެދުވަނީ ސުވާލު އުފެދިފައެވެ.
ޔޫއެފާ ޗެމްޕިއަންސް ލީގު ސެމީ ފައިނަލްގައި ޖަރުމަނުގެ ލެއިޕްޒެގާއި ދެކޮޅަށް ޕީއެސްޖީ ނުކުންނާނީ މާދަމާ ރޭ 12:00 ގައެވެ. މިމުބާރާތުގެ ސެމީއަށް ޕީއެސްޖީ ދަތުރުކޮށްފައި މިވަނީ 25 އަހަރަށް ފަހުގައެވެ. ޕީއެސްޖީ މިމުބާރާތުގެ ސެމީގައި އެންމެފަހުން ކުޅެފައިވަނީ 1995 ވަނަ އަހަރުއެވެ. އިޓަލީގެ އޭސީ މިލާންއާއި ދެކޮޅަށް ކުޅުނު އެ ސެމީ ފައިނަލުން ޕީއެސްޖީ ދަށްވީ އެގްރިގޭޓް 3-0 ގެ ނަތީޖާއަކުންނެވެ.
