ހދ.ކުޅުދުއްފުށީގައި މިއަދު ހެނދުނު ހިނގި އެކްސިޑެންޓެއްގައި ޕިކަޕަކުންޖެހި އެރަށު އަމީނީމަގުގައި ހުރި މަގުބައްތިއެއް ވެއްޓިއްޖެއެވެ.
މަޢުލޫމާތު ލިބިފައިވާގޮތުގައި މިއަދު 9:00 ހާއިރު ހިންގި މިއެކްސިޑެންޓްގައި އެއްވެސް މީހަކަށް ގެއްލުމެއް ލިބިފައެއް ނުވެއެވެ. ނަމަވެސް ޕިކަޕް ޖެހުނު މަގުބައްތިވަނީ އެކީއެކަށް ބުޑުންލުހި ވެއްޓިފައެވެ.
މިހާދިސާ ހިނގިއިރު ޕިކަޕް ދުއްވަން އިނީ 21 އަހަރުގެ ދިވެހި ފިިރިހެނެއް ކަމަށާއި އަދި އޭނާގެ އަތުގައި ލައިސަންސް އޮންނަ ކަމަށް ފުލުހުން ވިދާޅުވިއެވެ.
މިދުވަސްވަރަކީ ރާއްޖޭގައި އެކްސިޑެންޓްތައް ވަރަށް ބޮޑަށް އިތުރުވެފައިވާ ދުވަސްވަރެކެވެ. ނިމިގެންމިދަޔަ ހަފްތާގައި ވެރިރަށް މާލޭގައި އެކަނިވެސް 54 އެކްސިޑެންޓް ހިނގާފައިވާކަމަށް ޓުރެފިކް މެނޭޖްމެންޓް ޑިޕާޓްމެންޓްއިން ނެރުނު ތަފާސް ހިސާބުތަކުން ދައްކައެވެ.
