ކޮވިޑް-19ގެ ޕެންޑެމިކްއާއި ގުޅިގެން ދުނިޔޭޣެ 93 އިންސައްތަ ގައުމުތަކުގައި، ނަފްސާނީ ބަލިތަކަށް ފަރުވަދޭ ތަންތަން އޮތީ މަޑުޖެހިފައި ނުވަތަ ހުއްޓިފައިކަމަށް ޑަބްލިއުއެޗްއޯ އިން ހެދި ސާވޭއަކުން ދައްކައިފިއެވެ.
130 ގައުމު ހިމިނައިގެން ޑަބްލިއުއެޗްއޯއިން ހެދި ސާވޭގެ ނަތީޖާއި ދައްކާގޮތުގައި ދުނިޔޭގެ ގިނަ ގައުމުތަކުގައި ނަފްސާނީ ބަލިތަކަށް ފަރުވާހޯދުމަށް ހިދުމަތްދޭތަންތަނަށް ވަނީ ވަރަށް ބޮޑު ނޭދެވޭ އަސަރެއްކޮށްފައެވެ. އަދި ނަފްސާނީ ދުޅަހެޔޮކަމަށް ޤައުމުތަކުން ހޭދަކުރާވަރު ވީހާވެސްއަވަހަކަށް އިތުރުކުރަން ޖެހޭކަން މި ސާވޭއިން ދައްކައެވެ.
ޑަބްލިއުއެޗްއޯގެ މި ސާވޭ ޕަބްލިޝްކޮށްފައިވާއިރު، ކުރިއަށް އޮތް ނަފްސާޅީ ދުޅަހެޔޮކަމުގެ ދުވަހާއި ދިމާކޮށް ޑަބްލިއުއެޗްއޯއިން ބޮޑު އިވެންޓެއް ބޭއްވުމަށް ވަނީ ހަމަޖައްސާފައެވެ. އެގޮތުން މި އިވެންޓު އޮންނާނީ އޮކްޓޯބަރު މަހުގެ 10 ގައި ފާހަގަކުރާ ދުނިޔޭގެ ނަފްސާޅީ ދުޅަހެޔޮކަމުގެ ދުވަހުއެވެ.
ގައުމުތަކުން ނަފްސާނީ ދުޅަހެޔޮކަމަށް ހޭދަކުރާވަރު ވަރަށް ބޮޑަށް ދަށްކަމަށް ޑަބްލިއުއެޗްއޯއިން މި ސާވޭގައި ހާމަކޮށްފައިވެއެވެ. އެގޮތުން ކޮވިޑް-19 ގެ ޕެންޑެމިކްގެ ކުރިން، ނަފްސާނީ ދުޅަހެޔޮކަމަށް ގައުމުތަކުން ހޭދަކޯށްފައިވަނީ، ދައުލަތުގެ ހެލެތް ބަޖެޓްގެ 2 އިންސައްތައަށްވުރެވެސް ދަށް މިންވަރެއްކަމަށް ޑަބްލިއުއެޗްއޯއިން ބުނެފައިވެއެވެ.
މީގެ އިތުރުން މި ޕެންޑެމިކްގެ ސަބަބުން، މީހުން ނަފްސާނީ ބަލިތަކަށް ފަރުވާ ހޯދުމަށް ބޭނުންވެގެން ވަރަށް ގިނަ މީހުން އެކަމަށް ޑިމާންޑްކުރާކަމަށް މި ސާވޭއިން ދައްކާފައިވާކަމަށް ޑަބްލިއުއެޗްއޯއިން ހާމަކުރިއެވެ.
130 ގައުމު ހިމިނައިގެން ޑަބްލިއުއެޗްއޯއިން ހެދި މި ސާވޭ އަކީ މިއަހަރުގެ ޖޫން މަހުން ފެށީގެން އޮގަސްޓް މަހުގެ ނިޔަލަށް ހަދާފައިވާ ސާވޭއެކެވެ.
