ޖިންސީ ގޯނާގެ ޝިކާރައަކަށް ވީ ކުޑަކުއްޖެއްގެ މައުލޫމާތު ރައްޔިތުންގެ މަޖިލިހުގެ ކޮމިޓީއެއްގައި ހާމަކުރެވުނީ އޮޅުމަކުންކަމަށް ޕްރޮސިކިއުޓަރ ޖެނެރަލް ހުސައިން ޝަމީމް ވިދާޅުވެއްޖެއެވެ.
އަދި މިމައްސަލާގައި ޝަމީމް މަޢާފަށްވެސް އެދިވަޑައިގަތްފައިވާއިރު، މިއަދު ކުރެއްވި ޓްވީޓެއްގައި ވިދާޅުވީ، އެކޮމިޓީގައި ޕީޖީ އޮފީހުގެ ސްޓާފަކަށް އެމަޢުލޫމާތު ޙިއްސާކުރެވިފައިވަނީ އެ ކޮމިޓީ ބްރޮޑްކާސްޓް ކުރަމުން ދާކަން ނޭނގިހުރެ އޮޅުމަކުންކަމަށާއ މިފަދަ ކަމެއް އިތުރަށް ތަކުރާރު ނުވާނޭހެން އެއޮފީހުގެ އިންތިޒާމްތައް މިހާރު ހަމަޖައްސާފައިވާނެކަމަށެވެ.
ބުދަ ދުވަހު ލައިވް ކުރި ހިއުމަން ރައިޓްސް އެންޑް ޖެންޑަރ ކޮމިޓީގެ ބައްދަލުވުމުގައި، އެ ކުއްޖާގެ މައްސަލައިގައި ހާމަވާން ނުޖެހޭ އެތައް ތަފްސީލެއް ވަނީ ހިއްސާކުރައްވާފައެވެ.
A genuine mistake yesterday at Majlis by PGO staff. Apologies! They weren’t aware it was broadcasting live. We’ve made arrangements to make sure this won’t repeat again.
It’s how we best we fail that define how good we become.
— Hussain Shameem (@HuShameem) October 15, 2020
ޖިންސީ ކުށުގެ ގާނޫނުގައިވާ ގޮތުން، ޖިންސީ އަނިޔާގެ ނުވަތަ ޖިންސީ ގޯނާގެ ޝިކާރައަކަށްވާ ކުޑަކުދިންގެ މައުލޫމާތު ހާމަކުރުމަކީ ކުށެކެވެ. އަދި ކުށުގެ ޝިކާރައަކަށް ވެފައިވާ ކުދިންގެ މައުލޫމާތު ހާމަކުރުމަކީ ކުޑަކުދިންގެ ހައްގުތައް ހިމާޔަތްކުރުމުގެ ގާނޫނުގެ ދަށުން ވެސް މަނާކޮށްފައިވާކަމަކަށްވާއިރު، އެ ގާނޫނުގެ 33 ވަނަ މާއްދާގައި ބަޔާންކުރަނީ، ކުޑަކުދިންގެ ކަރާމާތައް އުނިކަން އަންނަ ގޮތަކަށް އެ ކުދިންގެ ޒާތީ މައުލޫމާތު ހާމަކޮށްގެން ނުވާނެ ކަމަށެވެ.
އަދި މިފަދަ މައްސަލަ ކޯޓަށް ހުށައެޅުމުގެ ބާރު ޖެންޑަަރ މިނިސްޓަރަށް ލިބިދީފައިވާއިރު، ކުށް ސާބިތުވާ މީހުން 10،000ރ. އާއި 15،000ރ. ދެމެދުގެ އަދަދަކުން ޖޫރިމަނާ ކުރުމުގެ ބާރު ކޯޓަށް ލިބިދެއެވެ.