ސިޔާސީ ބޭފުޅުންނަށް އެއްޗެއް ވިސްނެންވެއްޖެނޫންތޯ މަޖިލީހުގެ ކުރީގެ ނައިބު ރައީސް ރީކޯ މޫސަ ވިދާޅުވެއްޖެއެވެ.
ސިޔާސީ ޕޯޑިއަމްތަކުން މިއަދު ނުފެނު ކަމުގައިވިޔަސް، ރާއްޖޭގެ ސިޔާސީ މަޝްރަޙްގައި ހިގާ ކަންކަމާމެދު ސޯޝަލް މީޑިއާ މެދުވެރިކޮށް ރީކޯ ދަނީ ބަސްބުނެ އެބޭފުޅާގެ ޚިޔާލު ފާޅުކުރައްވަމުންނެވެ.
އެގޮތުން ރީކޯ މިއަދު ކުރެއްވި ޓްވީޓެއްގައި ވިދާޅުވެފައި ވަނީ ލާމެހިފައިވާ ދުނިޔޭގައި ތިބެގެން ސިޔާސީ ޕާޓީއަށް ބާރުހޯދަން ދުނިޔޭގެ ބޮޑެތިޤައުމުތަކަށް އެއްޗެތި ކިޔެއްކަމަކު މިރާއްޖޭގެ މައްޗައް އެއްވެސްބަޔަކަށްއަތްގަދަ ނުކުރެވޭނެކަމުގެ ކޮޅުމަތި ފެންނަމުންދާކަން ހީވާ ކަމަށެވެ.
ސިޔާސީ ބޭފުޅުންނަށް އެއްޗެއް ވިސްނެންވެއްޖެނޫންތޯ؟ ލާމެހިފައިވާ ދުނިޔޭގައި. ތިބެގެން ސިޔާސީ ޕާޓީއަށް ބާރުހޯދަން ދުނިޔޭގެ ބޮޑެތިޤައުމުތަކަށް އެއްޗެތި ކިޔެއްކަމަކު މިރާއްޖޭގެ މައްޗައް އެއްވެސްބަޔަކަށްއަތްގަދަ ނުކުރެވޭނެކަމުގެ ކޮޅުމަތި އެބަފެނޭހެން ހީވަނީ
— Moosa Maniku (Reeko) (@ReekoMoosa) October 30, 2020
ރީކޯ މިފަދައިން ވިދާޅުވެފައިވާއިރު އެމެރިކާގެ ސެކްރެޓަރީ އޮފް ސްޓޭޓް މައިކް ޕޮމްޕިއޯ ރާއްޖެ އަށް ކުރެއްވި ދަތުރުފުޅުގައި ފޮރިން މިނިސްޓަރު އަބްދުﷲ ޝާހިދާ އެކު ބޭއްވެވި ޕްރެސް ބްރީފިންގައި ޗައިނާ އަށް ވަރަށް ބޮޑަށް ފާޑުވިދާާޅުވެފއިވަނިކޮށެވެ.
ބުދަ ދުވަހު ބޭއްވި މި ބްރީފިންގައި ޗައިނާއަށް ފާޑުވިދާޅުވަމުން ޕޮމްޕިއޯ ވިދާޅުވެފައި ވަނީ ޗައިނާގެ އަމަލުތައްހުންނަ ގޮތުން ރާއްޖެ ފަދަ ކުދި ޖަޒީރާ ގައުމުތަކުގެ ސަލާމަތީ ކަންތައްތައް ވަރުގަދަކުރުން ކުރިއަށް ވުރެ މުހިއްމު ވެފައިވާކަމަށެވެ.
ޕޮމްޕިއޯގެ މި ވާހަކަ ފުޅާއި ގުޅިގެން ޗައިނާއިން ވަނީ އޭނާގެ ވާހަކަ ފުޅުތަކަށް ވަރުގަދަ ރައްދެއް ދެއްވާފައެވެ. އެގޮތުން ރާއްޖޭގައި ހުންނަ ޗައިނާގެ އެމްބަސީން ނެރެފައިވާ ބަޔާނެއްގައި ވިދާޅުވައި ވަނީ ޕޮމްޕެއޯ މަސައްކަތް ކުރައްވާފައިވަނީ ޗައިނާ އާއި ރާއްޖެ ދޭތެރެޖެއްސުން ކަމަށާއި، އެމެރިކާގެ މަގުސަދަކީ ޗައިނާ އާއި އެހެން ގައުމުތަކާއެކު އޮތް ގުޅުން ހީނަރުކުރުން ކަމަށެވެ.
ޕޮމްޕޮއޯގެ މި ދަތުރުފުޅުގައި ރާއްޖޭގައި އެމެރިކާގެ އެމްބަސީއެއް ހުޅުވުމަށްވެސް ވަނީ ނިންމަވާފައެވެ.
