ރާއްޖޭގައި އާންމުކޮށް ނުކުރާ ސާޖަރީއެއް ށ. ފުނަދޫގައި ހުންނަ އެ އަތޮޅުގެ ހޮސްޕިޓަލުގައި ކާމިޔާބުކަމާއެކު މިއަދު ކޮށްފިއެވެ.
ހޮސްޕިޓަލުން މަޢުލޫމާތު ދީފައިވާގޮތުގައި މިއަދު އެ ހޮސްޕިޓަލުން ކުރިއަށް ގެންގޮސްފައިވަނީ "ސަބްމެންޑިބިއުލަރ ސަޔަލޯޑިނެކްޓޮމީ" ސާޖަރީއެކެވެ. މިއީ ހަށިގަނޑުގެ ކުޅު އުފައްދާ "ސަލައިވަރީ ގްލޭންޑް" ނެގުމަށް ހެދި ސާޖަރީއެއްކަމަށްވެސް ހޮސްޕިޓަލުން މައުލޫމާތު ދެއެވެ.
މި އޮޕަރޭޝަން ކޮށްފައިވަނީ އެ ހޮސްޕިޓަލުގައި ދެ އަހަރެއްހާ ދުވަހު މަސައްކަތްކޮށްފައިވާ މިސްރުގެ އޮޕަރޭޝަން ޑޮކްޓަރު އަސްލަމް އަހުމަދު ޒަކަރިއްޔާއެވެ.
ޑރ. އަސްލަމްއާއި ޙަވާލާދީ މިހާރު ނޫހުގައި ބުނެފައިވަނީ، ށ. އަތޮޅު ހޮސްޕިޓަލުގައި މި އޮޕަރޭޝަން އުމުރުން 39 އަހަރުގެ ދިވެހި ފިރިހެނެއްގެ ކަމަށާއި ޑޮކްޓަރަށް ދެއްކީ ކަރުދަށް ދުޅަވެ ރިއްސާތީ ކަމަށެވެ. ޑޮކްޓަރު ވިދާޅުވީ އެ މީހާ އަށް ކެއިން ބުއިމުގައި ވެސް ދަތިތައް ހުރި ކަމަށެވެ. ޑޮކްޓަރު ވިދާޅުވީ އެ މީހާގެ ސަލައިވަރީ ގްލޭންޑްސް ދުޅަވެފައިވާކަން، ބެލި ބެލުންތަކުން އެނގުމުން ސާޖަރީ ހަދަން ނިންމީ ކަމަށެވެ.
A rare surgery ,submandibular sialoadenectomy has been performed successfully in shaviyani atoll hospital in first time Of our history. May Allah (s.w) give patient speedy recovery and good health & fortune. Well done Dr. Eslam, and our team . @MoHmv @psmnewsmv @igmhmv pic.twitter.com/5xYO9cC3JJ
— ShaviyaniAtollHospital (@ShaviyaniH) November 6, 2020
އަދި އެ ހޮސްޕިޓަލަށް ލިބުނު ބޮޑު ކާމިޔާބީއެއްކަމަށްވެސް ފުނަދޫ ހޮސްޕިޓަލުގެ މެނޭޖަރު އަހުމަދު ޒުމްރަތުވަނީ ވިދާޅުވެފައެވެ.
ކޮވިޑް-19 ގެ ސަބަބުން ދަތުރުފަތުރު ކުރުމުގައި ބޮޑެތި އުނދަގޫތަކާއި ދިމާވެފައިވާ މިދަނޑިވަޅުގައި މާލެ ދިއުމުގެ ބަދަލުގައި ގިނަ ރައްޔިތުން މިހާރު ދައްކަނީ އަތޮޅުތެރޭގެ ހޮސްޕިޓަލް ތަކަށެވެ.
