މާމަގެ ގަހަނާތައް ވިއްކިޔަސް ޗައިނާއަށް ދައްކަންޖެހޭ ދަރަނި ނުދެއްކޭނެ ކަމަށް ރައްޔިތުން މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު ދެންމެ ކުރެއްވި ޓްވީޓެއްގައި ވިދާޅުވީ، މިއަދު ޖަޖިލީހުގައި ބަހުސް ކުރެވެމުންދަނީ 2021 ވަނަ އަހަރުގެ ބަޖެޓާއި ބެހޭގޮތުން ކަމަށާއި ސަރުކާރުގެ ރެވެނިއުގެ 53 އިންސައްތަ ހޭދަކުރަންޖެހޭނީ ދަރަނި ދެއްކުމަށް ކަމަށެވެ. މީގެ ތެރެއިން 80 އިންސައްތަ ދައްކާނީ ޗައިނާއަށް ކަމަށް ވިދާޅުވިއެވެ. އަދި މާމަގެ ގަހަނާތައް ވިއްކިޔަސް ޗައިނާއަށް ދައްކަންޖެހޭ ދަރަނި ނުދެއްކޭނެ ކަމަށް ނަޝީދު ވިދާޅުވިއެވެ.
Discussing 2021 budget in Majlis today. ???????? debt repayments next year will amount to 53% of government revenue. Over 80% of debt repayments will go to China. Totally unaffordable. Even if we sell our grandmother’s jewelry, we won’t be able to afford these repayments. pic.twitter.com/Vc2v8n2Kov
— Mohamed Nasheed (@MohamedNasheed) November 18, 2020
މިއަދު ބަޖެޓް ފެންނަން އޮތްގޮތް ވަރަށް ހުތުރުކަމަށާއި އެ ހުތުރުކަމަކީ މި ސަރުކާރުން ގެނައި ހުތުރުކަމެއް ނޫން ކަމަށާއި، އެކަން އެގޮތަށް ދިމާވީ ރައީސް އަބްދުﷲ ޔާމީންގެ ވެރިކަމުގައި ނެގި ދަރަނި މި ސަރުކާރަށް ދައްކަން ޖެހުމުން ކަމަށް ރައީސް ނަޝީދު އިއްވެ ވަނީ ވިދާޅުވެފައެވެ.
އެމަނިކުފާނު ވިދާޅުވީ، އަންނަ އަހަރަށް ލަފާކޮށް ސަރުކާރުން ހުށަހަޅާފައިވާ ބަޖެޓަށް ބުރަބޮޑުވެފައި ވަނީ ސަރުކާރުން ޗައިނާއިން ނަގާފައިވާ ބޮޑެތި ލޯނުތަކާއި ގުޅިގެން ކަމަށެވެ.
ރައީސް ނަޝީދު ވަނީ 2013 އާއި 2018 ވަނަ އަހަރާ ދެމެދު ޗައިނާ ރާއްޖެއަށް އިންތިހާއަށް ލޯނު ދީފައިވާއިރު އޭގެ ތެރެއިން ލޯނުތަކުގެ ގްރޭސް ޕީރިއަޑް ހަމަވެ، ބޮޑު ބައެއް އަނބުރާ ދައްކަން ޖެހިފައިވާ ކަމަށާއި އެގޮތުން ބަޖެޓުގައި ލޯނު އަނބުރާ ދެއްކުމަށް 4.9 ބިލިއަން ރުފިޔާ ހިމަނާފައިވާކަމަށް ވިދާޅުވެފައެވެ. އަދި ލޯނު އަނބުރާ ދެއްކުމަށް ހިމަނާފައިވާ 4.9 ބިލިއަން ރުފިޔާގެ ތެރެއިން 80 އިންސައްތައަށް ވުރެ ގިނަ ފައިސާއަކީ ޗައިނާއަށް ދޭން ޖެހޭ ފައިސާކަން ނަޝީދު ފާހަގަކުރައްވައެވެ.
