ޗައިނާއިން އެގައުމުގެ ދިދަ ހަނދުގައި ޖަހައިފިއެވެ.
މިއާއެކު ޗައިނާ ވެގެން ގޮސްފައިވަނީ އެމެރިކާއަށްފަހު ހަނދުގައި އަމިއްލަ ގައުމުގެ ދިދަ ޖެހި ފުރަތަމަ ގައުމަށެވެ. އެމެރިކާއިން ހަނދުގައި އެގައުމުގެ ދިދަ ޖަހައިފައިވަނީ 1969 ވަނަ އަހަރުއެވެ.
ޗައިނާގެ ނޭޝަނަލް ސްޕޭޗް އެޑްމިނިސްޓްރޭޝަންއިން އާންމުކުރި ފޮޓޯއިން ފެއްނަނީ ފަސްތަރީގެ ރަތް ޗައިނާގެ ގައުމީ ދިދަ ހަނދުގެ ބިމުގައި ޖަހައިފައިވާ މަންޒަރެވެ. މިމަންޒަރު ނަގައިފައިވަނީ ޗައިނާއިން ހަނދަށް ފޮނުވި ޗަންގުއޫ-5 ޖައްވީ އުޅަނދުންނެވެ.
ޗަންގުއޫ-5 ޖައްވީ އުޅަނދަކީ ހަނދުން ވެއްޔާއި ގަލާ އަދި ހިރަފުހުގެ ސާމްޕަލް ދުނިޔެ އަށް ގެނައުމަށް ފޮނުވައިފައިވާ ޖައްވީ އުޅަނދެކެވެ. މި އުޅަނދު މިހާރުވަނީ މިތަކެއްޖާއެކު ދުނިޔެއަށް އައުމުގެ ދަތުރު ފަށާފައެވެ. އެންމެ ފަހުން ހަނދުން ސާމްޕަލް ގެނެސްފައި ވަނީ 1976 ވަނަ އަހަރު އެވެ.
ޗަންގުއޫ-5 ޖައްވީ މިޝަންއަކީ ހަތްއަހަރު ދުވަހުގެ ތެރޭގައި ޗައިނާއިން ކާމިޔާބުކަމާއެކު ހަނދަށް ކުރި ތިންވަނަ ދަތުރެވެ. ޗައިނާގެ ޖައްވީ އުޅަނދުފަހަރުގައި ހަރުކޮށްގެން މީގެކުރިންވެސް އެގައުމުގެ ދިދަ ހަނދަށް ގެންގޮސްފައި ވެއެވެ. ނަމަވެސް މިއީ އެގައުމުގެ ދިދަ ހަނދުގައި ޖެހި ފުރަތަމަ ފަހަރެވެ.
