ބޭރަށް ދަތުރުކުރުމުގައި ދުނިޔެ ބަލައިގަންނަފަދަ ކޮވިޑް-19 ވެކްސިންގެ ޑިޖިޓަލް ވެކްސިން ޕާސްޕޯޓު ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން ރަސްމީކޮށް ތައާރަފްކޮށްފިއެވެ.
"ކޯވިޑް ސޭފް ޑިޖިޓަލް ޕާސްޕޯޓް" ގެ ނަމުގައި އެޗްޕީއޭ އިން ވެކްސިން ޕާސްޕޯޓް ރަސްމީކޮށް ތައާރަފްކޮށްފައިވަނީ އިއްޔެ އެވެ.
އެޗްޕީއޭ އިން ބުނީ، ކޯވިޑްސޭފް ވެކްސިން ޕާސްޕޯޓަކީ، އެމީހަކީ ކޯވިޑް-19 އިން ރައްކާތެރިވުމަށް ވެކްސިން ފުރިހަމަކޮށްފައިވާ މީހެއްކަމާއި، ފުރިހަމަކޮށްފައިވާ ވެކްސިންގެ މައުލޫމާތު ފެންނަން އޮންނާނެ ރަސްމީ، ޑިޖިޓަލް ލިޔުން ކަމަށެވެ.
ކޯވިޑް-19 އާ ގުޅިގެން ދަތުރު ކުރުމުގައި އެކި ޤައުމުތަކުން އަޅާފައިވާ ފިޔަވަޅުތަކުގެ ތެރެއިން ވެކްސިން ފުރިހަމަކުރުމުން ދޭ ލުއި ލިބުމަށްޓަކައި މި ޕާސްޕޯޓް އޮތުމުން ފަސޭހަވެގެންދާނެއެވެ. އަދި ކަމާގުޅިގެން ދިވެހި ރާއްޖެއާ ދޭދޭ ޤައުމުތަކާދެމެދު ވެވޭ އެއްބަސްވުންތަކުގެ ބޭނުމަށްވެސް މި ޕާސްޕޯޓް ބޭނުންކުރެވި ލުއިތަކެއް ލިބިގެންދާނެ ކަމަށް އެޗްޕީއޭ އިން ބުނެއެވެ.
މި ޕާސްޕޯޓު ދޫކުރާނީ https://covidsafe.gov.mv/ ވެބްސައިޓުންނެވެ.
މި ވެކްސިން ޕާސްޕޯޓުން އެ މީހަކު ވެކްސިން ފުރިހަަމަކޮށްފައިވާކަން އެނގިގެންދާނެއެވެ. އަދި ފުރިހަމަކޮށްފައިވާ ވެކްސިންގެ މައުލޫމާތު ވެސް ފެންނަން ހުންނާނެއެވެ. މީގެ އިތުުރުން ވެކްސިންގެ ބޫސްޓާ ޑޯޒެއް ޖަހައިފައިވާނަމަ އެ މައުލޫމާތު ވެސް ޕާސްޕޯޓުގައި ހިމެނެފައި ހުންނާނެއެެވެ.
ވެެކްސިން ޕާސްޕޯޓުގެ ސައްހަކަން ކަށަވަރުކުރުމަށްޓަކައި އެހެން ގައުމުތަކުން ލިޔުން ދޫކުރި ފަރާތާއި ސޮއިކޮށްފައިވާ ފަރާތް ވެރިފައިކުރާނެކަމަށް އެޗްޕީއޭއިން ބުންޏެވެ.
