ރޭ އާއްމުވި ފުލުހުން އަނިޔާކުރާ މަންޒަރު ފެންނަ ވީޑިއޯގައި ފެންނަ "ސްޓައިލް" އަށް އަނިޔާކުރާކަމަށް ކޮންމެ ތިން ކުއްޖަކުން ދެކުދިން ބުނާކަމަށް މަޝްހޫރު ޤާނޫނީ ވަކީލު އާސިފް ވިދާޅުވެއްޖެއެވެ.

ކޮމިޝަނަރ އޮފް ޕޮލިސް ޓެގްކުރައްވައި އާސިފް ކުރެއްވި ޓްވީޓެއްގައި ވިދާޅުވީ، ސްޕެޝަލް އޮޕަރޭޝަން (އެސްއޯ) ފުލުހުންނާއި ޑްރަގް އެންފޯސްމަންޓް ޑިޕާޓްމަންޓް (ޑެޑް) ފުލުހުންގެ ޚާއްޞަ އޮޕަރޭޝަންތައް ވީޑިއޯވެސް ކުރަންޖެހޭގޮތަށް ބަދަލުކުރަން ފެންނަ ކަމަށެވެ.

"ސްޕެޝަލް އޮޕަރޭޝަން (އެސްއޯ) ފުލުހުންނާއި ޑްރަގް އެންފޯސްމަންޓް ޑިޕާޓްމަންޓް (ޑެޑް) ފުލުހުން އެޓެންޑްވާ ހުރިހާ ސީންތައް ވީޑިއޯކުރަން ފުލުހުންގެ ޕްރޮފެޝަނަލް ސްޓޭންޑަރޑްސް ޑިޕާޓްމަންޓްގެ މައްޗަށް ލާޒިމުވާގޮތަށް ޤާނޫނާއި ގަވާއިދުތައް ތަރުތީބުކުރަން ފެނޭ." އާސިފް ވިދާޅުވިއެވެ.

"ޑްރަގް އެންފޯސްމަންޓް ޑިޕާޓްމަންޓް (ޑެޑް) ސީންތަކުގައި މިރޭ މިފެނުނު ސްޓައިލަށް ޓޯޗަރ ކުރާކަމަށް ކޮންމެ ތިން ކުއްޖަކުން ދެކުދިން ޝަކުވާކުރޭ." ކްރިމިނަލް ލޯޔަރުންގެ ތެރެއިން ފުންނާބުއުސް ލޯޔަރ އާސިފް ވިދާޅުވިއެވެ/

ކޯޓު އަމުރެއްގެ ދަށުން ގެއަކަށް ވަތް ފުލުހުންތަކެއް ތުހުމަތެއް ކުރެވޭ މީހަކަށް އަނިޔާކުރާ ވީޑީއޯއިން ފެންނަ ގޮތުގައި މައްސަލައެއްގައި ތުހުމަތު ކުރެވޭ މީހަކަށް ގިނަ އަދަދެއްގެ ފުލުހުން ވެގެން ބޮޑެތި އަނިޔާތަކެއް ވަނީ ކޮށްފައެވެ. އަތާއި ފައިން ފުލުހުން ވަނީ އެމީހާ ގައިގައި ތަޅާފައެވެ.

މިކަމާ ގުޅިގެން ކޮމިޝަނަރ އޮފް ޕޮލިސް މުޙައްމަދު ހަމީދު ކުރެއްވި ޓްވީޓެއްގައި ވިދާޅުވީ، ފުލުހުންގެ ތެރެއިން މައްސަލަ ބެލުމުގެ އިތުރުން، މި މައްސަލަ ބައްލަވައިދެއްވުން އެދި ހައުމަން ރައިޓްސް ކޮމިޝަން އޮފް މޯލްޑިވްސްގެ ރައީސްއަށް ދަންނަވާފައިވާ ކަމަށެވެ.

އިތުރަށް ޕޮލިސް ކޮމިޝަނަރު ވިދާޅުވީ، އެޗްއާރުސީއެމް އަށް މައްސަލަ ހުށަހެޅުއްވީ އެކަމުގައި ބައިވެރިވި ފުލުހުންގެ ނަންތަކާވެސް އެކުގައި ކަމަށާއި، ފުލުހުން ޢާއްމު ރައްޔިތުންނަށް އަނިޔާކުރުމުގެ ސަގާފަތް ނިމުމަކަށް ގެންނަންޖެހޭ ކަމަށެވެ.