ސްޕެނިޝް ލަލީގާގައި ރޭ ވަލަޑޮލިޑާއި ދެކޮޅަށް ރެއަލްމެޑްރިޑް ކުޅެ އެއްވަރުވި މެޗަށްފަހު، ކެތްތެރިވުމަށް ސަޕޯޓަރުންގެ ފަރާތުން ޒިނެދިން ޒިދާން އެދިއްޖެއެވެ.
މިސީޒަންގައި އަމިއްލަ ދަނޑުގައި ކުޅުނު ފުރަތަމަ މެޗުގައި ރޭ ވަލަޑޮލިޑާއި ދެކޮޅަށް ރެއަލްމެޑްރިޑް ނުކުތްއިރު އެމެޗު ނިމިގެން ދިޔައީ 1-1 ގެ ނަތީޖާއަކުން ދެޓީމު އެއްވަރު ވެގެންނެވެ.
މެޗުގައި ފެނިގެން ދިޔަ ދެލަނޑުވެސް ފެނިގެންގޮސްފައިވަނީ މެޗުގެ ފަހު ދިހަމިނަޓް ތެރޭގައެވެ. އެގޮތުން ފުރަތަމަ ލަނޑު 82 ވަނަ މިނަޓްގައި ރެއަލްމެޑްރިޑުން ޖެހިއިރު، އެލަނޑު އެކްލަބަށް ކާމިޔާބުކޮށްދިނީ ކަރިމް ބެންޒެމާއެވެ. އަދި ހަމިނަޓްފަހުން ވަލަޑޮލިޑްގެ ސާޖިއޯ ގާޑިއޯލާ ލަނޑެއްޖަހައި މެޗުގެ ނަތީނާ ހަމަހަމަކުރިއެވެ.
1-1 ގެ ނަތީޖާއަކުން ދެޓީމު އެއްވަރުވެގެން ނިމުނު މިމެޗުގައި ރެއަލްމެޑްރިޑްގެ ފަރާތުން ވަރުގަދަ ކުޅުމެއް ފެނިގެންގޮސްފައިވާއިރު، ގިިނަ ހަމަލާތަކެއް އުފައްދާފައިވާކަންވެސް ފާހަގަކޮށްލެވެއެވެ.
"ސަޕޯޓަރުންގެ ފަރާތުންވެސް އެހީތެރިކަން ބޭނުންވޭ. އިނގޭ މިއީ އުނދަގޫކަމެއްކަންވެސް. ޓީމުގެ ފަރާތުން ރަނގަޅު ނަތީޖާއެއް ނެރުމަށް އަބަދުވެސް މަސައްކަތްކުރާނަން." ޒިދާން ބުންޏެވެ.
މީގެއިތުރުން ޒިދާންބުނީ، ޓީމުގެ ކުޅުން އިތުރަށް ރަނގަޅު ކުރަންޖެހޭކަމަށާއި، 50 މުވަތަ 60 މިނަޓްގެ ރަނގަޅު ކުޅުމެއް ދެއްކިގެން މިޒަމާނުގައި މޮޅުނުވެވޭނެކަމަށާއި ނަމަވެސް 90 މިނަޓް ވަންދެން ހުއްޓާނުލައި، ރަނގަޅު މޮޅު ކުޅުމެއް ދައްކަން ޖެހޭނެކަމަށެވެ.
މިދިޔަ ސީޒަންގައި ރެއަލްމެޑްރިޑުގެ ފަރާތުން ފެނިގެންދިޔަ ދަށް ނަތީޖާއިން އަދިވެސް އަރައިނުގަނެވިގެން އުޅޭއިރު، ލީގުގައި ކުޅުނު ފުރަތަމަ މެޗު ސެލްޓަވިގޯއާއި ބައްދަލުކޮށް 1-3 ގެ ނަތީޖާއަކުން ރެއަލްމެޑްރިޑްވަނީ ކާމިޔާބުކޮށްފައެވެ.
ރެއަލްމެޑްރިޑަށް ކުރިއަށްވެސްދެން އޮތީ ލަލީގާ މެޗެކެވެ. މިއަންނަ މަހު އެއްވަނަ ދުވަހުގެ ރޭ ކުޅުމަށް ހަމަޖެޖިފައިވާ މިމެޗުގައި ރެއަލްމެޑްރިޑު ނުކުންނާނީ ވިލަރިއާލްއާއި ދެކޮޅަށެވެ.
