ސްޕެނިޝް ލަލީގާގައި ރޭ ކުޅުނު މެޗުގައި ގްރިޒްމަން ޖެހި ދެލަނޑާއެކު ބާސެލޯނާއަށް ލީގުގެ ފުރަތަމަ މޮޅު ލިބިއްޖެއެވެ.
އަމިއްލަ ދަނޑުގައި ރެއަލްބެޓިސްއާއި ދެކޮޅަށް ކުޅެވުނު މިމެޗު ބާސެލޯނާއިން ކާމިޔާބުކުރީ 5-2 ނަތީޖާއަކުންނެވެ.
މުޅި މެޗުހެން ބާސެލޯނާއިން ކޮންޓްރޯލްކުރި މިމެޗުގެ ފުރަތަމަ ލަނޑުޖަހައި ލީޑުނެހީ ރިއަލްބެޓިސްއިންނެވެ. މެޗުގެ 15 ވަނަ މިނަޓްގައި ފެނިގެންދިޔަ މިލަނޑު އެކްލަބަށް ކާމިޔާބުކޮށްދީފައިވަނީ ނަބިލް ފެކްރީއެވެ.
ފުރަތަމަ ހާފު ނިމުމުގެ ބާސެލޯނާއިންވަނީ ލަނޑެއްޖަހައި މެޗުގެ ނަތީޖާ ހަމަހަމަކޮށްފައެވެ. މިލަނޑު އެކްލަބަށް ޖަހައިދިނީ މިދިޔަ ޖުލައިމަހު އެކްލަބާއި ގުޅުނު އެންޓޮއިން ގްރިޒްމަންއެވެ.
ފުރަތަމަ ހާފު ދެޓީމު އެއްވަރުވެގެން ނިމުނުއިރު، ދެވަނަ ހާފަށް ނުކުމެ ފުރަތަމަ ފަސްވަނަ މިނަޓްގައި ގްރިޒްމަންވަނީ އިތުރު ލަނޑެއް ބާސެލޯނާއަށް ފުރަތަމަ ފަހަރަށް މެޗުގައި ލީޑުނަގައިދީފައެވެ. ޕެނަލްޓީ އޭރިއާ ރޮނގުމަތީ ކަހަލަގޮތަކަށްހުރެ ހިތްގައިމު ބަނާނާއަކުން ގްރިޒްމަން މިލަނޑުޖަހައިދިނީ ގޯލްކީޕަރުގެ ދުރުކަނަށެވެ.
އެއަށްފަހު ވަރުގަދަ ބާސެލޯނާއިން ފުލުފުލުން ލަނޑުޖަހައި ރެއަލްބެޓިސް މުޅިން މާޔޫސްކޮށްލިއެވެ. ބާސެލޯނާގެ އިތުރު ލަނޑުތައް އެކްލަބަށް ކާމިޔާބުކޮށްދީފައިވަނީ ކާލެސް ޕެރޭޒް. ޖޯޑީ އަލްބާ އަދި ވިދާލްއެވެ.
މެޗުގެ ފަހު ވަގުތުކޮޅު ރެއަލްބެޓިސްއިން އިތުރު ލަނޑެއްޖަހައި މުޅިޓީމަށް އާ ހިތްވަރެއް ގެނުވިއިރު، 79 ވަނަ މިނަޓްގައި ފެނިގެންދިޔަ މިލަނޑު އެޓީމަށް ކާމިޔާބުކޮށްދިނީ މޯރޯން ގާސިއާއެވެ.
މެސީއާއި ސުއަރޭޒް ނުހިމަނައި ކުޅުނު މިމެޗުގައި ގްރިޒްމަންގެ ފަރާތުން މޮޅު ކުޅުމެއްވަނީ ފެނިގެން ގޮސްފައެވެ.
ރޭގެ މެޗުގައި ދެން އެންމެ ފާހަގަކޮށްލެވެނީ ބާސެލޯނާއަށް ކުޅުނު ޒުވާން ފަޓީއެވެ. މިމެޗުގައި ބާސެލޯނާގެ އަރިމަތިން ވިންގާއަކަށް ކުޅުނު އަންސޫ ފަޓީގެ އުމުރަކީ 16 އަހަރާއި 298 ދުވަހެވެ. މިއީ ބާސެލޯނާގެ ތާރީޚުގައި ސީނިއާ ޓީމަށް ކުޅުނު ދެވަނައަށް އެންމެ ޒުވާންކުޅުންތެރިޔާއެވެ. ބާސެލޯނާގެ ސީނިއާ ޓީމަށް އެންމެ ޒުވާން އުމުރުގައި ކުޅުމުގެ ރެކޯޑް އޮންނާނީ ވިސެންޓޭ މާޓިނޭޒް އަތުގައެވެ. 1941 ވަނަ އަހަރުގެ އޮކްޓޯބަރމަހު ރެއަލްމެޑްރިޑާއި ދެކޮޅަށް މާޓިނޭޒް ކުޅެނުއިރު އޭނާގެ އުމުރަކީ 16 އަހަރާއި 280 ދުވަހެވެ.
ލީގު ހުޅުވި މެޗުގައި އެތުލެޓިކޯ ބިލްބާއޯއާއި ބައްދަލުކޮށް ބާސެލޯނާވަނީ 1-0 ގެ ނަތީޖާއަކުން ބަލިވެފައެވެ.
