ސްޕެނިޝް ލަލީގާގައި ރޭ ވިލަރެއާލްއާއި ދެކޮޅަށް ކުޅުނު މެޗުން، ކޯޗު ޒިދާން ބޭނުންނުވެގެން ވިއްކާލަން އުޅުނު ގެރެތު ބޭލް ރެއަލްމެޑްރިޑު ސަލާމަތްކޮށްދީފިއެވެ.
ވިލަރެއާލްގައި ކުޅުނު މިފޯރިގަދަ މެޗުގައި ދެފަހަރަށް ވިލަރެއާލުންވަނީ ލީޑު ނަގާފައެވެ. ނަމަވެސް އެދެފަހަރުވެސް ރެއަލްމެޑްރިޑަށް ނަތީޖާ ހަމަހަމަކޮށްދީފައިވަނީ ބޭލްއެވެ. އަދި ރޭގެ މެޗުގެ އިތުރު ވަގުތު ދެއްކި ދެވަނަ ރީނދޫކާޑާއެކު ބޭލްއަށްވަނީ ރަތްކާޑެއްވެސް ދައްކާފައެވެ.
ރެއަލްމެޑްރިޑްގެ ޑިފެންޑަރު ސާޖިއޯ ރާމޯސްއަށް ހެދުނު ގޯހެއްގެ ފައިދާ ނަގައި މެޗުގެ ފުރަތަމަ ލަނޑު ވިލަރެއާލުން ޖަހާފައިވަނީ މެޗުގ 12 ވަނަ މިނަޓްގައެވެ. އެކަމްބީގެ ހަމަލާއެއް ރެއަލްމެޑްރިޑްގެ ކީޕަރު ކޫޓުއާ ދިފާޢުކޮށް ބޯޅަ އޭރިއާތެރެއަށް ހުސްވި ވަގުތު މިލަނޑުޖަހާފައިވަނީ ޖެރާޑް މޮރޭނޯއެވެ.
ވިލަރެއާލްގެ ލަނޑަށްފަހު ރެއަލްމެޑްރިޑުންވަނީ ހަމަލާތައް ވަރުގަދަކުރިއިރު، ފުލުފުލުގައި ހަމަލާތައް ކުރަމުންދިޔައިރު، ކަސެމީރޯ، ރާމޯސް އަދި ބެންޒެމާގެ ހަމަލާތަކުން ވިލަރެއާލަށް ޕްރެޝަރު ބޮޑުވިއެވެ. އަދި ފުރަތަމަ ހާފުގެ އިތުރު ވަގުތުގައި ބޭލް ޖަހައިދިން ލަނޑަކާއެކު ހާފު ނިމުމުގެ ކުރިން ނަތީޖާ ހަމަހަމަކުރިއެވެ.
ދެވަނަ ހާފު ފެށުމާއެކު އަނެއްކާވެސް ފެނިގެންދިޔައީ އިތުރު ލަނޑެއް ބޭނުންވެފައިއޮތް ރެއަލްމެޑްރިޑުން ކުރަމުންދިޔަ ވަރުގަދަ ހަމަލާތަކެވެ. މީގެން އެއްވެސް ހަމަލާއެއް ކާމިޔާބުވާގޮތްނުވެ އުޅެނިކޮށް ވިލަރެއާލުން އިތުރު ލަނޑެއްޖަހައި ރެއަލްމެޑްރިޑް ސިއްސުވާލިއެވެ. 74 ވަނަ މިނަޓްގައި ފެނިގެންދިޔަ މިލަނޑު ރެއަލްމެޑްރިޑަށް ކާމިޔާބުކޮށްދިނީ މޮއިސެސް ގޮމޭޒްއެވެ.
ވިލަރެއާލްގެ ދެވަނަ ލަނޑުޖެހިތާ 12 މިނަޓްފަހުން ބޭލް އަނެއްކާވެސް އިތުރު ލަނޑެއް ކާމިޔާބުކޮށް ރެއަލްމެޑްރިޑަށް ނަތީޖާ ހަމަހަމަކޮށްދިނެވެ. މިލަނޑަށްފަހު އިތުރު ލަނޑެއް ފެނިގެން ގޮސްފައިނުވާއިރު، ރޭގެ މެޗުގައި ދެޓީމު އެއްވަރުވެފައިވަނީ 2-2 ގެ ނަތީޖާއަކުންނެވެ.
