ޖާސޫސް ކުރުމުގެ ކުށް ސާބިތުވެ މަރަށް ހުކުމް ކޮށްފައިވާ އިންޑިއާގެ ގުލްބުޝާން ޖާދަވްއާ ބައްދަލުކުރުމުގެ ފުރުސަތު އިންޑިއާގެ އޮފިޝަލުންނަށް ޕާކިސްތާނުން ދީފިއެވެ.
ޕާކިސްތާނުގެ ފޮރިން އެފެއާރސް މިނިސްޓަރ މުހައްމަދު ފައިސަލް ވިދާޅުވީ، މިބައްދަލުކުރުން ކުރިއަށްދާނީ ޕާކިސްތާނުގެ ވެރިރަށް އިސްލާމްއާބާދުގައި ފޮރިން އެފެއާރސް މިނިސްޓްރީގައި މިއަދު ކަމަށެވެ. ނަމަވެސް މިބައްދަލުވުން ކުރިއަށްދާނެ ވަގުތެއް ހާމަކޮށްފައެއް ނުވެއެވެ.
މިބައްދަލުކުރުމާއި ގުޅޭގޮތުން އިންޑިއާ ސަރުކާރުން އަދި އެއްވެސް ބަހެއް ބުނެފައެއް ނުވެއެވެ.
އިންޑިއާއިން މީގެކުރިން ގުލްބަޝާން ޖާދަވްއާއި ބައްދަލު ކުރުމަށް ޕާކިސްތާނުން ދިން ފުރުސަތުވަނީ ގަބޫލު ނުކޮށްފައެވެ. އެފަހަރު އިންޑިއާއިން ބުނެފައިވަނީ، ވިއޭނާ ކޮންވެންޝަން އޮން ކޮންސިއުލަރ ރިލޭޝަން ބުނާފަދަ މިނިވަންކަންމަތީ ބައްދަލުކުރުމުގެ ފުރުސަތު ފަހިކޮށްދީފައި ނުވާކަމަށެވެ.
ޕާކިސްތާނުން 49 އަހަރުގެ ޖާދަވް ހައްޔަރު ކުރީ 2016 ވަނަ އަހަރެވެ. އެގައުމުން ބުނި ގޮތުގައި އޭނާ ހައްޔަރު ކުރީ ވަގު ޕާސްޕޯޓެއް ބޭނުންކޮށްގެން އެގައުމަށް ގޮސް، ބަލޮޗިސްތާނުގައި ހުއްޓާ އެވެ.
