ދުނިޔޭގެ މަޝްހޫރު ޔޫޓިއުބްގެ ތަރި "ޕިއުޑީޕައި" އޭނަގެ ދުވަސްވީ ލޯބިވެރިޔާ މާޒިޔާ އާއި. މި އަހަރުގެ އޮގަސްޓް މަހުގެ ތެރޭގައި ވަނީ ކައިވެނިކޮށްފައެވެ. އަދި ދެމީހުން ފުރަތަމަ އެންގޭޖްވި ތަންކަމުގައިވާ ޖަޕާނަށް މި ދެބައިވެރިންގެ ދެވަނަ ހަނީމޫން ދަތުރުގޮސްފައިވާއިރު، މި ހަނީމޫން ދަތުރުގައި ކަންތައް ހިނގީ ދެބައިވެރިންވެސް ބޭނުންވިގޮތަކަށް ނޫނެވެ.
ޖަޕާނަށް ކުރި މި ދެބައިވެރިންގެ ހަނީމޫން ދަތުރުގައި، އުރައެއްގައި ބަންދުކޮށްފައިވާ ވަޅިއެއް ކަނޑާލި ވަގުތު، އުރައިން ބޭރަށް ވަޅި ވެއްޓި މާޒިއާގެ ފައިގެ އިނގިއްޔަކަށް ވަޅި ހެރުމުގެ ސަބަބުން އިނގިލި ވަރަށް ބޮޑަށް ހަލާކުވެފައިވާކަމަށް ސޯޝަލް މީޑިއާގައި އޭނަ މިވަނީ ބުނެފައެވެ.
އެގޮތުން އިންސްޓަގްރަމްގައި މި ދެބައިވެރިންގެ ހަނީމޫން ދަތުރުގެ ފޮޓޯތައް ހިއްސާކުރަމުން، މި ވަޅީގެ ފޮޓޯއަކާއެކު ޕޯސްޓް ކޮށްފައިވާ ފޮޓޯއެއްގެ ކެޕްޝަންގައި މާޒިއާ އޭނަގެ ސަޕޯޓަރުންނަށް މި ވާހަކަތައް ވަނީ ހިއްސާކޮށްފައެވެ. ވަޅި އޭނަގެ އިނގިއްޔަށް ހެރުމުން ވަރަށް ގިނައިން ލޭއައިކަމަށްވެސް މި ޕޯސްޓްގައި އޭނާ ވަނީ ލިޔެފައެވެ.
2018 ވަނަ އަހަރު މި ދެބައިވެރިން ޖަޕާންގައި އެންގޭޖް ވެފައިވާއިރު، ގައުމުގައި މިހާރު ދެބައިވެރިން ހިތްގައިމު ޗުއްޓީއެއް ހޭދަކުރަމުންދާއިރު، މި ދަތުރުގެ ފޮޓޯތައް ދަނީ ފޭނުންނާއި ހިއްސާކުރަމުންނެވެ.
މި އަހަރުގެ އޯގަސްޓް މަހު ޕިއުޑީ ޕައި އަދި މާޒިޔާ ކައިވެނިކޮށްފައިވާއިރު، މި ދެ ޖޯޑުގެ ހިތްގައިމު ކައިވެނީގެ ފޮޓޯތަކަށް ގިނަ ބަޔެއްގެ ސަމާލުކަން ވަނީ ލިބިފައެވެ. އަދި ސޯޝަލް މީޑިއާގައި އެ ދުވަސްވަރު އެންމެ ގިނައިން ދެކެވުނު ވާހަކައަކީވެސް އެއީއެވެ.
