ހއ. އަތޮޅުގެ ރިސޯޓް ދާއިރާ ކުދިންގެ ވަޒީފާ ގެއްލުމުގެ މައްސަލައަށް ހައްލެއް ހޯއްދަވައި ދެއްވުން އެދި އެ އަތޮޅު ތަމްސީލް ކުރައްވާ ރައްޔިތުންގެ މަޖިލީހުގެ ފަސް މެންބަރުން ޓުއަރިޒަމް މިނިސްޓަރު ޑރ. އަބްދުﷲ މައުސޫމާ ބައްދަލުކުރައްވައިފިއެވެ.
މިކަން ހާމަކޮށް ހޯރަފުށި ދާއިރާގެ މެންބަރު އަހުމަދު ސަލީމް (ސައްލެ) މިއަދު ކުރެއްވި ޓްވީޓެއްގައި ވިދާޅުވީ ހއ. ގެ ފަސް މެންބަރުން މިއަދު ޓޫރިޒަމް މިނިސްޓަރާއި ބައްދަލުކުރައްވާފައިވާ ކަމަށެވެ. މި ބައްދަލުކުރެއްވުމުގައި ހއ. ގެ ރިސޯޓު ދާއިރާއިން ވަޒީފާ ގެއްލުނު މުވައްޒަފުންގެ މައްސަލައަށް ހައްލެއް ހޯދައި ދެއްވުމަށް އެދިވަޑައިގެންފައިވާނެ ކަމަށެވެ.
މީގެއިތުރުން ހއ. އަތޮޅުގައި ފަތުރުވެރިކަމުގެ ދާއިރާގެ އިތުރު ޕްރޮޑަކްޓުތައް ތަރައްގީ ކުރުމާއި ގުޅޭ ގޮތުން ވެސް ޓޫރިޒަމް މިނިސްޓަރާއެކު ބޭއްވި ބައްދަލުކުރެއްވުމުގައި މަޝްވަރާ ކުރެވިކަމަށް ސައްލެ ވިދާޅުވިއެވެ.
HA ge 5 membarun Tourism Minister Dr @Mausoom_Maus aa miadhu bahdhalu koh HA ge resort dhaairaa in kudhinge vazeefa gellumuge massala ah halleh hoadhavaidhehvun edhi dhennevin adhi atholhuga ithuru tourism product thah develop kurumah massakaiy avas kohdhehvumah ves dhennevin. pic.twitter.com/3oS4gaMawq
— Ahmed Saleem (@SalleHoarafushi) September 6, 2020
މިބައްދަލުވުމަށްފަހު ސައްލެ ވިދާޅުވީ މިކަން ހައްލު ކުރުމަށް ކުރެވެން ހުރި ހުރިހާ މަސައްކަތެއް ކުރައްވާނެ ކަމަށް މިނިސްޓަރ ވިދާޅުވި ކަމަށާއި މިއީ ވަރަށް ބޮޑު ހިތްހަމަޖެހުމެއް ކަމަށެވެ.
ކޮވިޑް-19 އާއި ގުޅިގެން މުޅި ދުނިޔެ ކަހަލަ ގޮތަކަށް ފުރަބަންދަކަށް ގޮސްފައިވާއިރު މިކަމުގެ ސަބަބުން އެންމެ ބޮޑު އަސަރެއްކުރި އެއް އިންޑަސްޓްރީއަކީ ޓުއަރިޒަމް އިންޑަސްޓްރީއެވެ. ރާއްޖޭގެ ގިނަ ޒުވާނުން ވަޒީފާ އަދާކުރަމުން އަންނަ މި އިންޑަސްޓްރީއަށް މި ކުރި އަސަރާއެކު މި އިންޑަސްޓްރީގައި މަސައްކަތްކުރާ ގިނަ އަދަދެއްގެ މުވައްޒަފުންގެ ވަޒީފާވަނީ ގެއްލި ސަރުކާރުން ފޯރުކޮށްދޭ އެހީއަށް ބަރޯސާވާން ޖެހިފައެވެ.
