ބަދަލަކަށް އެދުމެއްނެތި އަމިއްލަ ރުހުމުގައި ހެޔޮހިތުންކުރާ އިންސާނީ ޚިދުމަތަށްވުރެ ވަކިން އަގުބޮޑު ޚިދުމަތެއްނެތްކަމަށް ރައީސުލް ޖުމްހޫރިއްޔާގެ ނައިބު ފައިސަލް ނަސީމް ވިދާޅުވެއްޖެއެވެ.
ދުނިޔޭގެ ފެންވަރުގައި ފާހަގަ ކުރެވޭ ދަރުމައަށް މަސައްކަތް ކުރާ މީހުންގެ ދުވަސް މިއަދު ފާހަގަ ކުރެވެމުންދާއިރު ނައިބު ރައީސް ވިދާޅުވެފައިވަނީ ރާއްޖޭގައި ހިލޭ ސާބަހަށް މަސައްކަތްކުރައްވާ ހުރިހާ ދަރުމަވެރިންނަށް، ބައިނަލްއަޤްވާމީ ވޮލަންޓިއަރުންގެ ދުވަހުގެ ތަހުނިޔާ ފޮނުވާކަމަށާއި ބަދަލަކަށް އެދުމެއްނެތި، އަމިއްލަ ރުހުމުގައި ހެޔޮހިތުންކުރާ އިންސާނީ ޚިދުމަތަށްވުރެ ވަކިން އަގުބޮޑު ޚިދުމަތެއްނެތް ކަމަށެވެ.
ބައިނަލްއަޤްވާމީ ވޮލިންޓިއަރުންގެ ދުވަސް މިއަދު ފާހަގަ ކުރަމުންދާއިރު، މުޅި ދުނިޔެވެސް މިވަނީ ބޮޑު ބަލިމަޑުކަމެއްގެ ވަބާއާއި ކުރިމަތިލާން ޖެހިފައެވެ. މި ދަތިހާލުގައި ޤައުމަށާއި ރައްޔިތުންނަށް ޚިދުމަތް ކުރުމުގައި ވޮލެންޓިއަރުންގެ ދަޢުރުވަނީ ވަރަށް ބޮޑަށް ފުޅާވެފައެވެ. އަދި މި ފަދަ އެތައް ދަރުމަވެރީންގެ އަގު ނުކުރެވޭ މަސައްކަތްތައް އަޅުގަނޑުމެންނަށްވެސް ދަނީ ފެންނަމުންނެވެ.
ރާއްޖޭގައި ހިލޭ ސާބަހަށް މަސައްކަތްކުރައްވާ ހުރިހާ ދަރުމަވެރިންނަށް، ބައިނަލްއަޤްވާމީ ވޮލަންޓިއަރުންގެ ދުވަހުގެ ތަހުނިޔާ ފޮނުވަން. ބަދަލަކަށް އެދުމެއްނެތި، އަމިއްލަ ރުހުމުގައި ހެޔޮހިތުންކުރާ އިންސާނީ ޚިދުމަތަށްވުރެ ވަކިން އަގުބޮޑު ޚިދުމަތެއްނެތް. ތިޔަ ދީލަތި ޚިދުމަތަށް ޝުކުރިއްޔާ
— Faisal Naseem (@FaisalNasym) December 5, 2020
މިދުވަހާއި ގުޅިގެން ހޯމް މިނިސްޓްރީން ވިދާޅުވެފައި ވަނީ މި ފަދަ ދުވަހެއް ފާހަގަ ކުރުމުގެ ބޭނުމަކީ، ދަރުމައަށް ކަންކަން ކުރުމަށް ހިތްވަރު ދިނުމާއި ދަރުމައަށް މަސައްކަތް ކުރާ ފަރާތްތަކަށް ހިތްވަރު ދިނުންކަމަށެވެ. އަދި އެކަމުގެ ރޫޙާއި ޝައުގުވެރިކަން އުފައްދައި މުޖުތަމައު ހޭލުންތެރި ކުރުންކަމަށެވެ.
އެމިނިސްޓްރީން ވިދާޅުވެފައި ވަނީ ދަރުމައަށް މަސައްކަތް ކުރުމަކީ ވަކި މީހަކަށް އޮތްކަމެއް ނޫންކަމަށާއި އެކަމުގެ ޝައުގުވެރިކަން ހުރި ކޮންމެ މީހަކު ވެސް ކުރުން މުހިންމު ކަމެއްކަމަށެވެ.
ދަރުމަވެރިންގެ ދުވަހާއިގުޅިގެން އެ ބޭފުޅުން ކުރައްވާ ދީލަތި ޚިދުމަތަށް ނައިބު ރައީސް ފައިސަލް ނަސީމް ވަނީ ޝުކުރު އަދާކުރައްވާފައެވެ.
