ބަދިގެތެރޭން މިއަދު މިގެނެސްދެނީ ބްރެޑް ރޯލްސް ތައްޔާރުކުރާނެގޮތެވެ.
ބޭނުންވާތަކެތި:
- 1 ޖޯޑު ކުކުޅު މަސް ( ފެނުކެއްކުމަށްފަހު ކުދިކޮށް ކޮށާފައި)
- 1 ފިޔާ (ކިއުބް ކޮށްކޮށާފައި)
- ރޯމިރުސް (ރަހަލާވަރަށް)
- ހިކަނދިފަތް (ކުދިކޮށް ކޮށާފައި)
- 1 ލޮނުމެދު (ގާނާފައި)
- 1/2 ކެޕްސިކަމް (ކުދިކޮށް ކޮށާފައި)
- ލޮނު (ރަހަލާވަރަށް)
- އަސޭމިރުސް (ރަހަލާވަރަށް)
- ތެޅިމިރުސް (ބޭނުންނަމަ)
- 1 ސައިސަމްސާ ސޯޔާސޯސް
- 2 ސައިސަމްސާ މަޔޮނައިސް
- 1/2 ޖޯޑު ޗީޒް (ގާނާފައި)
- ޕާން ( ޕާން ފޮތިތަކުގެ ކައިރި ނަގާފައި)
- 4 ބިސް
- ފާރޮށިކުނޑި
ތައްޔާރުކުރާނެގޮތް:
އެންމެފުރަތަމަ ފިޔާ، މިރުސް އަދި ހިކަނދިފަތް އެޅުމަށްފަހު ކުޑަ ތެޔޮކޮޅެއްގައި ރަތް ކޮށްލާށެވެ. ދެން ކޮށާފައި ހުރި ކުކުޅު މަސްކޮޅާއި ކެޕްސިކަމް އަދި ލޮނުމެދުކޮޅު އޭގެތެރެއަށް އެޅުމަށްފަހު މަޑު ގިނީގައ 1 މިނެޓް ވަންދެން ހާކާލާށެވެ. އެއަށްފަހު ލޮނު، އަސޭމިރުސް، ސޯޔާސޯސް އަދި ތެޅިމިރުސް ކޮޅު އަޅާ ރަނގަޅަށް އެއްކޮށްލާށެވެ. ރަނގަޅަށް އެއްވުމުން މަޔޮނައިސްކޮޅު އަޅާ ރަނގަޅަށް ހާކާލާށެވެ. ދެން ތައްޓަކަށް އޮއްސާލުމަށްފަހު ރަނގަޅަށް ހިހޫވުމުން ޗީޒްކޮޅު އަޅާ އެއްކޮށްލާށެވެ.
ޕާންފޮތިތަށް ރޮށިދަމާ އެތިގަނޑުގައި ތުނިކޮށް ދަމާލާށެވެ. އެއަށްފަހު ތައްޔާރުކުރި މަސްގަނޑުން އެތިކޮޅެއް އެޅުމަށްފަހު ރޯލްސް ގޮތަށް އޮޅާލާށެވެ. ދެން ރޯލްސް ތަކުގައި ބިސް ހޭކުމަށް ފަހު ފާރޮށި ކުނޑިލައި ތެލުލާށެވެ. މިހާރު މިވަނީ ބްރެޑް ރޯލްސް ތައްޔާރުކޮށް ނިމިފައެވެ.
