ފެށުން ބަދިގެތެރޭން މިފަހަރު މި ގެނެސްދެނީ ފަސޭހަކަމާއެކު ޕޮޓޭޓޯ ޕައި ތައްޔާރު ކުރާނެ ގޮތެވެ.
ބޭނުންވާ ތަކެތި:
- 6 އަލުވި (ދިގަށް ނުވަތަ ފަތިކޮށް ކޮށާފައި)
- ތެޔޮ
- 2 ފިޔާ (ކުދިކޮށް ކޮށާފައި)
- 2 ހިކަނދިފަތް (ކުދިކޮށް ކޮށާފައި)
- 1 މިރުސް (ކުދިކޮށް ކޮށާފައި)
- 1 މަސްދަޅު
- 1 ސަމުސާ އަސޭ މިރުސް
- ލޮނު (ރަހަލާވަރަށް)
- 3 ބިސް
ތައްޔާރު ކުރާނެ ގޮތް:
އެންމެ ފުރަތަމަ އަލުވިތައް ދިގަށް ނުވަތަ ތުނިކޮށް، ފަތިކޮށް ކޮށުމަށްފަހު ތެލުލާނީއެވެ. ޗިޕްސް ގޮތަށް ތެލުލެވުމުން ދެން އެވީ މަސްގަނޑު ތައްޔާރު ކުރާށެވެ. ފިޔާ، ލޮނު، މިރުސް، ހިކަނދިފަތް، އަސޭމިރުސް، މަސްދަޅު އެއްކޮށް ރަނގަޅަށް މޮޑެލާށެވެ. ދެން އެއަށްފަހު 3 ބިސް ކުޑަ ތައްޓެއްގައި ލޮނާ އަސޭމިރުސް އަޅައިގެން ގިރާލާށެވެ.
ޕައި ތައްޔާރު ކުރުމަށްޓަކައި ތަވާގައި ނުވަތަ ޓްރޭގައި ކުޑަ ތެޔޮ ކޮޅެއްލާށެވެ. ފުރަތަމަ ތެލުލި އަލުވި ތަކުގެ ތިންބައި ކޮށްފައި އެއްބައި ޓްރޭގައި އަތުރާލުމަށްފަހު މަސްގަނޑުގެ ދެބައިކޮށްފައި އެއްބައި ފަތުރާލާށެވެ. އަނެއްކާވެސް އަލުވިތަކުން ލޭޔާއެއް މަސްގަނޑުގެ މަތީ އަތުރާލާނީއެވެ. ދެން މަސްގަނޑުގެ ބާކީބައި އަޅުމަށްފަހު އެންމެ މަތީވެސް އަލުވި ތައް އަތުރާލާނީއެވެ. އެއަށްފަހު އެންމެ މަށްޗަށް، ކުރިން ގިރި ބިސްތައް އަޅާ ފިހެލާށެވެ. އޭރުން މިވަނީ އީޒީ ޕޮޓޭޓޯ ޕައި ތައްޔާރުކޮށް ނިމިފައެވެ.
