ސިޓީތަކާއި އިދާރީ ދާއިރާތައް ހިންގުމާއި ޢާންމު މަސައްކަތްތަކާބެހޭ ވަޒީރު ޢާދަމް ޝަރީފް ޢުމަރު ވިދާޅުވެފައިވަނީ، 55 ކައުންސިލްގެ އައު އިމާރާތް އެޅުމުގެ މަސައްކަތުގެ ދަށުން 35 ކައުންސިލެއްގެ ޢަމަލީ މަސައްކަތް މިމަހު ފަށާނެ ކަމަށެވެ.
ކޮންޓްރެކްޓަރ ފައިނޭންސް އުޞޫލުން މި މަޝްރޫޢު ހަވާލުކޮށްފައިވަނީ ރަޝީދު ކާޕެންޓްރީ އެންޑް ކޮންސްޓްރަކްޝަން (އާރުސީސީ) އާއެވެ. މި މަޝްރޫޢުގެ ދަށުން މިހާރު 20 ރަށެއްގެ ކައުންސިލް އިމާރާތުގެ އަމަލީ މަސައްކަތް ކުރިއަށްދާއިރު، އިތުރު 35 ކައުންސިލްގެ މަސައްކަތް މި މަހުގެ ތެރޭގައި ފެށުމަށް ވަނީ ހަމަޖެހިފައެވެ.
ވަޒީރު އާދަމް ޝަރީފް ވިދާޅުވެފައިވަނީ، "55 ކައުންސިލް އެއްފަހަރާ މަސައްކަތް ފަށާއިރު ބޭނުންވާ ތަކެތި ރަށްރަށަށް ފޯރުކޮށްދިނުމާއި ސަބް ކޮންޓްރެކްޓަރުން ހޯދުމުގެ މަސައްކަތް އާރްސީސީން ވަރަށް ބޮޑަށް ކުރިއަށް ގެންދޭ" ކަމަށެވެ. އަދި މިހާރު ސަބް ކޮންޓްރެކްޓަރުން ނުލިބި އޮތީ އެންމެ ތިން ރަށުގައި ކަމަށާއި، ގިނަ ރަށްރަށުގައި މަސައްކަތަށް ބޭނުންވާ ތަކެތި ހޯދައި، މަސައްކަތް ފެށުމަށް ތައްޔާރުވެފައިވާ ކަމަށް ވަޒީރު ވިދާޅުވިއެވެ.
މި މަޝްރޫޢުގެ އިތުރުން، ޗައިނާ ސަރުކާރުގެ ހިލޭ އެހީގެ ދަށުން އިތުރު 50 ކައުންސިލެއްގެ އިމާރާތް ތަރައްޤީކުރުމަށްވެސް ވަނީ ހަމަޖެހިފައެވެ. މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޚާއްސަ ސިޔާސަތެއްގެ ދަށުން ކުރިއަށްގެންދާ މަސައްކަތެކެވެ.
ސަރުކާރުން ވިދާޅުވެފައިވާ ގޮތުގައި، މި މަޝްރޫޢުތަކާއެކު ކައުންސިލްތަކުން ރައްޔިތުންނަށް ފޯރުކޮށްދޭ ޚިދުމަތްތައް އިތުރަށް ހަރުދަނާވެ، ރަށްރަށުގެ ތަރައްޤީއަށް މަސައްކަތްކުރުމަށް ކައުންސިލްތަކަށް ތަނަވަސް ފުރުސަތުތަކެއް ލިބިގެންދާނެއެވެ. އަދި މި މަސައްކަތްތައް 2024 ވަނަ އަހަރުގެ ޖުލައި މަހުގެ ނިޔަލަށް ނިންމުމަށް ވަނީ އަމާޒު ހިފާފައެވެ.
