ފަތުރުވެރިކަމުގެ ދާއިރާއަށް އުފާވެރި ޚަބަރެއް ގެނެސްދެމުން، އައްޑޫ ސިޓީގައި ހުންނަ ޝަންގްރިއްލާ ވިލިނގިލީ ރިސޯޓު އަލުން ހުޅުވުމުގެ ތައްޔާރީތަކާ ގުޅޭގޮތުން ސަރުކާރުން އިސްކޮށް މަޝްވަރާތައް ބާއްވައިފިއެވެ. މި މަޝްވަރާތަކުގައި މި އަހަރުގެ ޑިސެންބަރު މަހުގެ ފަހުކޮޅު، ޚާއްސަކޮށް ޑިސެންބަރު 25 ގައި ރިސޯޓު ހުޅުވުމަށް އަމާޒު ހިފާފައިވާކަން ވަނީ ހާމަވެފައެވެ.
މިކަމާ ގުޅޭގޮތުން ފަތުރުވެރިކަމާއި ތިމާވެށްޓާ ބެހޭ ވަޒީރު ޠާރިޤު އިބްރާހިމް ވަނީ މީސްމީޑިއާގައި މައުލޫމާތު ހިއްސާކުރައްވާފައެވެ. ވަޒީރު ވިދާޅުވީ ޝަންގްރިއްލާ ގުރޫޕުގެ އިންވެސްޓްމެންޓް އެންޑް އެސެޓް މެނޭޖްމެންޓްގެ ވެރިޔާ ކްރިސް ފޮންގް އަދި ޝަންގްރިއްލާ ވިލިނގިލީ ރިސޯޓުގެ ޖެނެރަލް މެނޭޖަރު ހަރުވޭ ޑުބޮކްސްއާ ބައްދަލުކުރައްވައި، ޑިސެންބަރު 25 އަށް ރިސޯޓް ހުޅުވުމަށް ކުރިއަށްދާ ތައްޔާރީތަކާ ގުޅޭގޮތުން މަޝްވަރާކުރެވުނު ކަމަށެވެ.
ޝަންގްރިއްލާ ބަންދުކޮށްފައިވަނީ މީގެ ފަސް އަހަރު ކުރިން، 2020 ވަނަ އަހަރުގެ މާރޗް މަހު، ކޯވިޑް-19ގެ ބަލިމަޑުކަމާ ގުޅިގެންނެވެ. އެހެންނަމަވެސް، މިހާ ދިގު މުއްދަތަކަށް ރިސޯޓު ނުހުޅުވި އޮތުމަކީ އައްޑޫ ސިޓީގެ ރައްޔިތުންގެ މެދުގައި ބޮޑު ކަންބޮޑުވުމެއް އުފެދިފައިވާ ކަމެކެވެ. ޝަންގްރިއްލާ އަލުން ހުޅުވައި، އޭގެ މަންފާ އައްޑޫގެ ރައްޔިތުންނަށް ހޯދައިދިނުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މުހިންމު ވަޢުދުފުޅެކެވެ.
ރާއްޖޭގެ އެންމެ ދެކުނުގައި ލަގްޒަރީ ފެންވަރަށް ތަރައްޤީކޮށްފައިވާ މި ރިސޯޓަކީ 284 އެނދުގެ ބޮޑު ރިސޯޓެކެވެ. މިއީ އައްޑޫގައި ހިންގަމުންދިޔަ އެންމެ ބޮޑު ރިސޯޓު ކަމަށްވާއިރު، މަތީ ފަންތީގެ ފަތުރުވެރިންނަށް ޚިދުމަތް ދިނުމަށް އެކި ވައްތަރުގެ ވިލާތައް މިތަނުގައި ހިމެނެއެވެ. އެގޮތުން 60 ވޯޓަރ ވިލާ، 26 ބީޗް ވިލާ، 28 ޕޫލް ވިލާ، 16 ޓްރީ ހައުސް ވިލާ އަދި 2 ޕްރެޒިޑެންޝަން ވިލާ ހިމެނެއެވެ.
