އިލްމުވެރިންގެ މަޖިލީހުގެ ނައިބް ރައީސް ޑރ. އިޔާޒް ދީނީ އިލްމުވެރިންނަށް ހުތުރު އަރުވާ ކަމަށް ގަލޮޅު އުތުރު ދާއިރާގެ މެމްބަރު، އީވާ އަބްދުﷲ ވިދާޅުވެއްޖެއެވެ.
ޖިންސީ ކުށުގެ ގާނޫނަށް ހުށަހަޅާފައިވާ އިސްލާހަށް މިއަދުގެ މަޖިލިސް ޖަލްސާގައި ވާހަކަދައްކަވަމުން މެމްބަރު އީވާ، ޖިންސީ ގޯނާ ލިބެނީ އަންހެނުން އަޅާ ހެދުމުގެ ސަބަބުން ކަމަށް ދޭހަވާ އިބާރާތަކުން ޑރ. މުހައްމަދު އިޔާޒް ކުރެއްވި ޓުވީޓަކާ ދެކޮޅަށް ނުރުހުން ފާޅުކޮށް ބަހުގެ ހަމަލާތަކެެއް ދެއްވާފައެވެ.
އެގޮތުން ޓުވިޓާ ހޭންޑަލްގެ ކުރިއަށް ޑޮކްޓަރު ޖަހާލާފައި، ޓީވީއަށް އަރާ އިނދެ ޝެއިޚް ކިޔާލާފައި މި ލިޔަނީ އަންހެން މީހާ އައުރަ ނިވާ ވީމާ ޖިންސީ އަނިޔާއެއް ނުހިނގާނެކަމަށާއި މިއީ ވަރަށް މުޑުދާރު އަމަލެއް ކަމަށް އީވާ ވިދާޅުވެފައިވެއެވެ. އަދި ޝެއިޚުން ކަމަށް ބުނާ މީހުން މިފަދަ ވާހަކަ ދެއްކުމަކީ އިސްލާމް ދީނަށާއި، ދީނީ ދަންނަ ބޭކަލުންނަށް ހުތުރު އެރުވުން ފަދަ ކަމެއް ކަމަށް ވެސް އީވާ ވިދާޅުވެފައިވެއެވެ.
ޖިންސި އަނިޔާ ލިބެނީ އަންހެނުން އަޅާ ހެދުމުން ނުވަތަ ދާ ތަންތަނުގެ ސަބަބުން ކަމަށް ބުނުމަކީ ޖިންސީ އަނިޔާ ކުރާ މީހުނަށް ހިތްވަރު ދިނުންކަމުގައި އީވާ ވިދާޅުވިއެވެ. އަދި އިސްލާމް ދީނަކީ އަންހެނުންނަށް އިހްތިރާމް ކުރަން ގޮވާ ދީނެއްކަމަށާއި، އަންހެނުން ބާރުވެރިކޮށް މުދާވެރި ކުރަން ގޮވާލާ އަދި އޯގާތެރިކަމާއެކު އަންހެނުންނަށް އަޅާލަން ގޮވާލާ ދީނެއް ކަމަށެވެ. އަދި އަންހެނުންގެ ހިމާޔަތުގައި އޮތް ދީނެއް ކަމަށާއި އެހެންކަމުން އެފަދަ ވާހަކަތައް ދެއްކުމަކީ އިސްލާމް ދީން ބޭނުންކޮށްގެން އުންމަތުގެ ހުރިހާ އަންހެނުންނަށް ފުރައްސާރަކުރުން ކަމުގައި ވިދާޅުވިއެވެ.
އީވާ ވިދާޅުވެފައިވަނީ "އަޅުގަނޑު ތި ޑރ. މުހައްމަދު އިޔާޒަށް ދަންނަވާލަން ބޭނުން ހަބަރުުދާރޭ! ހުއްޓާލާށޭ! ފަހަތަށް ޖެހޭށޭ! އަޅުގަނޑު ދަންނަވާލަން ބޭނުމީ، ދީނުގެ ނަމުގައި ދިވެހި އަންހެނުންނަށް ފުރައްސާރަ ކުރާކަށް ތި ޓުވިޓާ ހޭންޑަލް ބޭނުން ކުރިއްޔާ މި މައިކް، ގަލޮޅު އުތުރުގެ މި މައިކް އަޅުގަނޑުގެ އަތުގައި އޮތްހާ ހިނދަކު އަޅުގަނޑު މި ދަންނަވަނީ، އަޅުގަނޑު އިރާދަކުރެއްވިއްޔާ ދިވެހި އަންހެނުންގެ ހިމާޔަތުގައި، ކުރާ ފަޟީހަތް ކުރަން، އެ ކުރާ ގޯނާ ކުރަން ދިޔަކަ ނުދޭނަމޭ. އަޅުގަނޑު މި މައިކް އިރާދަކުރެއްވިއްޔާ އޭނާއާ ދެކޮޅަށް ބޭނުންކުރާނަމޭ" އެވެ.
އަހަރު ނުފުރޭ ތުއްތު ކުއްޖާ ރޭޕްކުރަނީ، އަދި ބައްޕައިން އަމިއްލަ ދަރިން ރޭޕްކުރަނީ އެކުދިން ކޮންކަހަލަ ހެދުމެއް ލައިގެން ތިބީމަތޯ ސުވާލުކޮށް އީވާ ވަނީ ވާހަކަފުޅު ދައްކާވާފައެވެ. އަދި މިފަދަ ވާހަކަ ތަކަކީ މުޖުތަމައު ތެރޭގައި އަނިޔާވެރިކަން އިތުރުކޮށް، އަންހެނުންނަށް އޮތް ގަދަރު ކުޑަ ކުރަން ދައްކާ ވާހަކަ ކަމަށް ބުނެފައިވެއެވެ.
އިސްލާމްދީނަކީ އަންހެނުން ފުރަތަމަ މުދާވެރި ކުރުވި ދީންކަމަށާއި އިސްލާމް ދީނުގައި މަންމަގެ ނަން ތިން ފަހަރު އައުމަށް ފަހު ބައްޕަގެ ނަން އައިސްފައިވާކަމަށާއި، އެހެންކަމުން އަޅުގަނޑުމެންނަށް ގަދަރާއި އިހްތިރާމްކުރަން ގޮވާލާ މި ދީނުގެ ނަމުގައި ޝެއިޚް ކިޔައިގެން ދިވެހި އަންހެނުން ފުރައްސާރަކުރާތަން ބަލާކަށް އަޅުގަނޑުމެން ނުތިބޭނެކަމަށް ވިދާޅުވެފައިވެއެވެ.
އީވާ ވިދާޅުވެފައިވަނީ މިފަދަ ވާހަކަދައްކާ މީހުން އެކުރަނީ ކުށެއް ކަމަށާއި ފާހިޝް ކަންކަމަށް މަގުފަހިވާ ދޮރުތައް ބަންދުކުރަން ޑރ. އިޔާޒް ގޮވާލައްވާނަމަ އެންމެ ފުރަތަމަ ކުރަންޖެހޭ ކަމަކީ އިޔާޒް ފަދަ ބޭފުޅުން ވާހަކަ ދެއްކިޔަ ދިނުން ހުއްޓާލުންކަމަށެވެ.
