ޑިމޮކްރެޓިކް ރިޕަބްލިކް އޮފް ކޮންގޯއަށް ކަނޑައަޅާފައި ހުންނެވި އިޓަލީވިލާތުގެ ސަފީރު ލޫކާ އަޓަނާސިއޯ ދަތުރުކުރައްވަމުން ގެންދެވި ކޮންވޯއީއަކަށް އިއްޔެ ދިން ޙަމަލާގައި ސަފީރު އަވަހާރަވުމާ ގުޅިގެން، ފޮރިން މިނިސްޓަރ ޢަބްދުﷲ ޝާހިދު އެޙަމަލާ ކުށްވެރިކުރައްވައިފިއެވެ.
މިނިސްޓަރ ޝާހިދު ވިދާޅުވީ ސަފީރު އަވަހާރަވި ޚަބަރު އެއްސެވީ ފުން ހިތާމަޔާ އެކުގައި ކަމަށާއި، ޑިޕްލޮމެޓިކް ކޮމިއުނިޓީއަށް އަމާޒުކޮށް ދިން މި ޓެރަރިސްޓް ހަމަލާ ހަރުކަށި އިބާރާތުން ކުށްވެރިކުރައްވާކަމަށެވެ. އަދި ސަފީރުގެ އާއިލާއަށް ތައުޒިޔާ ވިދާޅުވިއެވެ.
Deeply saddened to learn of the tragic demise of Amb. Luca Attanasio in Democratic Republic of Congo. Strongly condemn this evil act of terrorism against the diplomatic community. Heartfelt condolences to the families of the Ambassador and other victims of the attack@luigidimaio
— Abdulla Shahid (@abdulla_shahid) February 22, 2021
ރިޕޯޓުތައް ބުނާ ގޮތުން ލޫކާ މަރާލާފައިވަނީ އދ. އަށް ނިސްބަތްވާ ކާރެއްގައި ދަތުރު ކުރައްވަނިކޮށް، ކާރަށް ބަޑި ޖަހައިގެންނެވެ. އެ ހާދިސާގައި ލޫކާގެ އިތުރުން، އޭނާއާއެކު ދަތުރު ކުރި އިޓަލީގެ އަސްކަރީ އޮފިސަރަކާއި ޑްރައިވަރު ވެސް ވަނީ މަރުވެފައެވެ. ހަމަލާދިން ސަރަހައްދުގެ ގަވަރުނަރާ ހަވާލާދީ ބީބިސީގައި ބުނެފައިވަނީ، އެ ހަމަލާ ދީފައިވަނީ ހަ މީހެއްގެ ގުރޫޕަކުންނެވެ.
ނަމަވެސް މިހަމަލާގެ ފަހަތުގައިވަނީ ކޮން ބައެއްކަން އަދި ނޭނގެއެވެ.
ކޮންގޯއަށް ކަނޑައެޅި ސަފީރުކަމުގެ މަގާމާ ލޫކާ ހަވާލުވެ ލެއްވީ 2017 ވަނަ އަހަރުއެވެ.
