ބަދިގެތެރޭން މިފަހަރު މި ގެނެސްދެނީ ސްޕޮންޖް ކޭކު ތައްޔާރުކުރާނެ ގޮތެވެ.

ބޭނުންވާތަކެތި:

• 4 ބިސް
• ވެނީލާ އެސެންސް (ކުޑަ ސަމްސަލެއް)
• 100ގ ބަޓާރ
• 1 ޖޯޑު ހަކުރު (250ގ)
•  1 ޖޯޑު ފުއް
• 1 ސައިސަމްސާ ބޭކިން ޕައުޑާރ
• ¼ ޖޯޑު ކިރު ( ފުލް ކްރީމް)

ތައްޔާރުކުރާނެގޮތް:

އެންމެ ފުރަތަމަ ތައްޓެއްގެ ތެރެއަށް ބިސް އަދި އެސެންސް ކޮޅު އަޅާލުމަށްފަހު މިކްސްޗާރ އިން 5 ވަރަކަށް މިނެޓް ވަންދެން ރަނގަޅަށް ގިރާލާށެވެ. އެއަށްފަހު ބަޓާރ އާއި ހަކުރު ވަކިން ތައްޓެއްގައި ރަނގަޅަށް އެއްކޮށްލާށެވެ. ރަނގަޅަށް އެއްވުމުން އޭގެތެރެއަށް ފުށާއި ބޭކިން ޕައުޑާރ ކޮޅު އަޅާ ރަނގަޅަށް މިކްސްކޮއްލާށެވެ. ދެން އޭގެތެރެއަށް އެންމެ ފުރަތަމަ މިކްސް ކުރި ބިސްތަށް އަޅާ ރަނގަޅަށް ގިރާލާށެވެ. އެއަށްފަހު ކިރުކޮޅު އަޅާ ރަނގަޅައް އެއްވަންދެން ހުރިހާއެއްޗެއް އެއްކޮން މިކްސްކޮއްލާށެވެ. ދެން ޓްރޭގައި ތެޔޮ ނުވަތަ ބަޓާރ ހޭކުމަށްފަހު ފުއްކޮޅެއް އަޅާ ޓްރޭގައި އެއްކޮށް ހާކާލާށެވެ. ދެން ގިރާފައި ހުރި ކޭކު ފުއްގަނޑު ޓްރޭގެ ތެރެއަށް އެޅުމަށްފަހު އަވަނަށް ލައި 180 ޑިގްރީގައި 45 މިނެޓް ވަނދެން ފިހެލާށެވެ. މިހާރު މިވަނީ ސްޕޮންޖް ކޭކު ތައްޔާރުކޮށް ނިމިފައެވެ.