ކޮވިޑް-19 ގެ ބަލިމަޑުކަމުން އަރައިގަތުމަށް ވެކްސިން އަކަށް ބޭނުންވެފައިވާ މި ދަނޑިވަޅުގައި ރައްކާތެރި ކޮވިޑް-19 ވެކްސިން އެއް ފޯރުކޮށްދިނުމަކީ އެންމެ މުހިންމު ކަންތައް ކަމުގައި ދުނިޔޭގެ ސިއްޙަތު ޖަމިއްޔާ (ޑަބްލިއުއެޗްއޯ) އިން ބުނެފިއެވެ.
ރައްކާތެރި ކޮވިޑް-19 ވެކްސިންއެއް ފޯރުކޮށްދިނުމަކީ އެންމެ މުހިންމު ކަންތައް ކަމަށް ޑަބްލިއުއެޗްއޯގެ ޗީފް ސައިންޓިސްޓް ބުނެފައިމިވަނީ، ޔުނިވާސިޓީ އޮފް އޮކްސްފޯޑް އާއި ގުޅިގެން އޭސްޓްރަޒިނީކާ އިން އުފައްދާ ވެކްސިންގެ ޓެސްޓްތަކުން ސައިޑް އެފެކްޓްސް ފެނުމުން މި ވެކްސިންގެ ޓެސްޓްތައް ހުއްޓާލާފައިވަނިކޮށެވެ.
ރައްކާތެރި ކޮވިޑް-19 ވެކްސިންއެއް އުފެއްދުމަކީ ގައުމުތަކުގެ އިގްތިސާދު ކުރިއެރުވުމަށާއި ކޮރޯނާ ވައިރަހުގެ ބަލިމަޑުކަމުން އަރައިގަތުމަށް އެޅޭނެ ވަރަށް ބޮޑު ފިޔަވަޅެކެވެ.
"އަވަހަށް ވެކްސިންއެއް އުފައްދާ ވާހަކަ ދެއްކިޔަސް އޭގެ މާނައަކީ ރައްކާތެރިކަމުގެ ފިޔަވަޅުތަކަށް ނުބަލައި އަވަހަށް ވެކްސިން އެއް އުފައްދާ ވާހަކައެއް ނޫން" ޑރ. ސައުމްޔާ ސްވަމިނާތަން ސޯސަލް މީޑިއާ އިވެންޓެއްގައި ބުނެފައިވެއެވެ.
"ވެކްސިން އުފެއްދުމުގައި ހުރިހާ ގަވާއިދަކަށް ބަލަން ޖެހޭނެ. މީހުނަށްދޭ ޑްރަގް އަދި ވެކްސިންތަކުގައި އެމީހުންގެ ރައްކާތެރިކަމަށް އެންމެ ފުރަތަމަ ބަލަންޖެހޭނީ" އޭނާ ބުނެފައިވެއެވެ.
އޮފް އޮކްސްފޯޑް އާއި ގުޅިގެން އޭސްޓްރަޒިނީކާ އިން އުފައްދާ ކޮވިޑް-19 ވެކްސިން އަކީ ދުނިޔޭގައި އެންމެ ކުރިއަރާފައިވާ ވެކްސިން ކަމުގައި ޑަބްލިއުއެޗްއޯ އިން މީގެ ކުރިން ވަނީ ބުނެފައެވެ.
އޮކްސްފޯޑް ކޮވިޑް-19 ގެ ވެކްސިންގެ ޓެސްޓްތަކުގައި ބައިވެރިވި ބައެއް މީހުންނަށް ސައިޑް އެފެކްޓްސް ފެންނަމުން ދިއުމުގެސަބަބުން ޓެސްޓްތައް ހެދުން ވަނީ ހުއްޓާލައިފައެވެ. އެގޮތުން މި ވެކްސިންގެ ޓެސްޓްތައް ހެދުން ހުއްޓާލާފައި ވަނީ ފޭސް 3 ގެ ޓެސްޓްތައް ކުރިއަށް ގެންދަނިކޮށެވެ.
