ގާނޫނު ތަންފީޒު ކުރާ މުއައްސަސާތަކުގެ ކަރާމާތް ނަގަހައްޓަން ޖެހޭ ކަމަށް ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ޑރ. ޝަހީމް މިފަދައިން ވިދާޅުވެފައި މިވަނީ ކޮމިޝަނަރު އޮފް ޕޮލިސް މުހައްމަދު ހަމީދު ކުލަބެއްގެ ތެރޭގައި ޕާޓީ ކުރައްވާތަން ފެންނަ ކަމަށް ބުނާ ވީޑިއޯއެއް ޝޯޝަލް މީޑިއާގައި އާންމުވެ ބައެއް ފަރާތްތަކުގެ ފާޑުކިޔުން އަމާޒުވެފައިވާ ދަނޑިވަޅެއްގައެވެ.
ޝަހީމް މިރޭ ކުރައްވާފައިވާ ޓްވީޓެއްގައި ބުނެފައިވަނީ، ބިރަކާއި ނުލާ އާއިލާ ގޮވައިގެން “ރާބޮއިގެން” ކުލަބުތަކުގައި ނަށާ މަޖާކުރާ މީހުން، ވެރިންނަށް ތިބެގެން ގައުމު ރަނގަޅު މިސްރާބަކަށް ހިނގައިދާނެތޯ ސުވާލު ކުރައްވާފައެވެ. އަދި ގާނޫނު ތަންފީޒު ކުރާ މުއައްސަސާތަކުގެ ކަރާމާތް ނަގަހައްޓަން ޖެހޭ ކަމަށާއި އިސްލާމީ ސަގާފަތާއި އަގީދާގެ ގަދަރު ކުޑަކޮށްލަން ފުރުސަތު ނުދެއްވުމަށް ވެސް ޝަހީމް ވަނީ ގޮވާލައްވާފައެވެ.
Biraka Nula Aailaa govaigen, Raaboyegen,Club thakugai nashai majaa kuraa meehun verinah thibegen Quamu rangalhu Misraabakah higaydhaaneba?Qaanoonu Thanfyzu Kuraa Mu'asasaathakuge Karaamathu nagahattan jehey! Islami Saqaafathaai Aqeedhaa ge Qadharu kudakollan furusathu nudhevva!
— Mohamed Shaheem Ali Saeed (@Mohamedshaheem1) May 11, 2020
ކޮމިޝަނަރު އޮފް ޕޮލިސް މުހައްމަދު ހަމީދުގެ އެ ވީޑިއޯއާ ގުޅިގެން ގިނަބައެއްގެ ނުރުހުން ފާޅުކުރަމުންދާ މި ދަނޑިވަޅުގައި އިދިކޮޅު ޕްރޮގްރެސިވް ކޮންގްރެސް ކޯލިޝަނުން ވަނީ ރައީސް އިބްރާހީމް މުހައްމަދު ސޯލިހާއި ހޯމް މިނިސްޓަރު އިމްރާން އަބްދުﷲ އަދި ނޭޝަނަލް އިންޓަގްރިޓީ ކޮމިޝަނުގެ ރައީސަށް ސިޓީއެއް ފޮނުއްވާ އެ މައްސަލަ މިނިވަންކަމާއި އެކުގައި ތަހުގީގު ކުރުމަށްވެސް ގޮވާލައިފައެވެ.
ކޮމިޝަނަރު އޮފް ޕޮލިސް މުހައްމަދު ހަމީދުގެ ވީޑިއޯ ލީކް ކޮއްލާފައިވަނީ “އެނޮނިމަސް އެމްވީ” ގެ ނަމުގައި ހިންގަމުންދާ ޓްވިޓަރ އެކައުންޓަކުންނެވެ.
“އެނޮނިމަސް އެމްވީ” އިން ރޭ މެންދަމު ވީޑިއޯ ލީކްކޮށް، ކުރި ޓްވީޓެއްގައި ބުނެފައިވަނީ އެ ވީޑިއޯއިން ފެންނަނީ ސީޕީ ހަމީދު އާއި އެމަނިކުފާނުގެ އަންބިކަނބަލުން ކަމަށެވެ.
“ކޮވިޑް-19 ގެ މި ދަނޑިވަޅު، ކޮމިޝަނަރު މުޙައްމަދު ހަމީދު އަދި އަނބިކަނބަލުން ނަޒީހާ އަހްމަދު މަސްތުގެ ހާލަތުގައި ނަށަނީ. ހާއްސަ ފެނިލުމެއްގެ ގޮތުން ދިވެހި ރެޑް ކްރެސެންޓުގެ ރައީސް އަލީ ނާޝިދު (އޮގަރު އައްޔަ).” އެނޮނިމަސްގެ ޓްވީޓްގައި ބުނެފައިވެއެވެ.
ސީޕީ ހަމީދުއާއި ވައްތަރު ބޭފުޅަކު މަސްތުވެ ޕާޓީކުރަމުންދިޔަ ތަނެއްގައި އުޅުއްވާ ވީޑިއޯ ރޭ ލީކް ކޮށްލުމުގެ ކުރިން، އެ ޓްވިޓަރ އެކައުންޓުން މިމަހުގެ 9 ވަނަ ދުވަހު ވަނީ މިކަމާ ގުޅޭ ފޮޓޯތައް އާއްމުކޮށްފައެވެ.
